Բուենոս Այրեսի քաղաքային օրենսդիր մարմինը Հայոց ցեղասպանության մասին միաձայն բանաձև է ընդունել` հիշատակելով Թուրքիայի տարածքում մեկուկես միլիոն հայի կյանք խլած կոտորածների հարյուրերորդ տարելիցը:
«Բուենոս Այրեսի ինքնավար քաղաքի օրենսդիր մարմինը նշում է «20-րդ դարի առաջին Ցեղասպանության», որի զոհն է դարձել հայ ժողովուրդը, հարյուրամյա տարելիցը, որը լրանում է այս տարվա ապրիլի 24-ին», - ասվում է բանաձևում:
Բացի այդ, Օրենսդիր մարմինը հայտարարել է, որ աջակցում է իրականացվող բոլոր միջոցառումներին, ևս մեկ անգամ իր համերաշխությունն է հայտնում Ցեղասպանությունը վերապրածներին և զոհերի ժառանգներին և պայքարում է հանուն մարդկության դեմ կատարված այս հանցագործության հիշատակության, ճշմարտության և արդարության` «Ժողովուրդների միջև հարգանքի ու հանդուրժողականության օրվա» մասին օրենքով, որով հիշատակում է Հայոց ցեղասպանության զոհերին:
«Տարիներ շարունակ Բուենոս Այրեսի քաղաքային իշխանությունը աջակցության քաղաքականություն է պահպանել Հայոց հարցի շուրջ», - մեկնաբանել է Բուենոս Այրեսում Հարավային Ամերիկայի Հայ ազգային խորհուրդի տնօրեն Կարոլինա Կարագյոզյանը:
