«Քաղաքացիական գիտակցություն» հասարակական կազմակերպության նախագահ Նարեկ Սամսոնյանին ու նրա եղբայր Հարություն Սամսոնյանին նախորդ գիշեր անհայտ մարդիկ ծեծի են ենթարկել տուն վերադառնալու ճանապարհին: Այս մասին NEWS.am-ին ասաց Նարեկ Սամսոնյանի ընկեր Դանիել Իոանիսյանը:
«Գիշերվա ժամը 2–ին տան ճանապարհին են եղել, Ավանում մի քանի մեքենա կանգնել են, առանց որեւէ բան ասելու ծեծել են ու թողել, գնացել: Քառասուն րոպե հետո մոտեցել է «Շտապօգնությունը», Նարեկի եղբայրն արդեն անգիտակից է եղել, նրանց տեղափոխել են հիվանդանոց, երկուսն էլ ունեն գլխուղեղի ցնցում: Նարեկի գլխին 12 կար է դրված, իսկ եղբոր արմունկն է կոտրված, պիտի վիրահատվի»,- ասաց Դանիել Իոանիսյանը:
Ծեծի ենթարկողները Նարեկի եւ նրա եղբոր մոտից, ինչպես նշեց Դանիել Իոանիսյանը, ոչինչ չեն գողացել, այդ պատճառով իրենք կարծում են, որ եղբայրներից նման կերպ հաշվեհարդար են տեսել:
Նարեկ Սամսոնյանն ու նրա եղբայրը չեն ցանկացել բուժումը հիվանդանոցում շարունակել եւ իրենց կամքով դուրս են գրվել: