Նոյեմբերի 24-ին Հայաստանի արտաքին գործերի նախարար Էդվարդ Նալբանդյանը հանդիպել է Մարոկկոյի ԱԳ նախարար Սալահեդդին Մեզուարին:
Երկու պետությունների արտաքին քաղաքական գերատեսչությունների ղեկավարները քննարկել են երկկողմ հարաբերությունների ընդլայնմանն առնչվող մի շարք հարցեր: Կարևորվել են քաղաքական երկխոսության ակտիվացումը, բարձրաստիճան այցելությունների կազմակերպումը, իրավապայմանագրային դաշտի ընդլայնումը։
Նախարարները մտքեր են փոխանակել, մասնավորապես, առևտրատնտեսական, մշակույթի, կրթության ոլորտներում համագործակցությունը զարգացնելու հետ կապված հարցերի շուրջ:
Անդրադարձ է արվել միջազգային և տարածաշրջանային հրատապ հարցերի:
Զրուցակիցները քննարկել են Մերձավոր Արևելքում տիրող իրավիճակը, ահաբեկչության դեմ միջազգային հանրության պայքարը, փախստականների խնդիրները:
Էդվարդ Նալբանդյանը ներկայացրել է ղարաբաղյան խաղաղ կարգավորմանն ուղղված՝ Հայաստանի և ԵԱՀԿ Մինսկի խմբի համանախագահ պետությունների ջանքերը:
Հանդիպմանն անդրադարձ է արվել միջազգային կառույցների շրջանակներում փոխգործակցությանը, Ֆրանկոֆոնիայի գագաթաժողովի օրակարգային հարցերի:
