Ձայների 90 կողմ, 0 դեմ, 0 ձեռնպահ հարաբերակցությամբ, այսօր խորհրդարանն առաջին ընթերցմամբ անցկացրեց «ՀՀ քրեական օրենսգրքում լրացում կատարելու մասին» եւ «ՀՀ քրեական դատավարության օրենսգրքում լրացում կատարելու մասին» օրինագծերի փաթեթը:
Փաթեթը ներկայացնելիս հիմնական զեկուցող ՀՀ արդարադատության նախարար Արփինե Հովհաննիսյանը երեկ նշեց, որ նախաձեռնության նպատակը կոռուպցիայի դեմ պայքարն է, այն վերաբերում է պետական պաշտոնյաների ապօրինի հարստացմանն ու դրա համար պատասխանատվության սահմանմանը: Նախատեսվում է, որ քրեական պատասխանատվության՝ երեքից վեց տարվա ազատազրկման կենթարկվեն ապօրինի հարստացած՝ հայտարարագիր ներկայացնելու պարտականություն ունեցող այն պաշտոնատար անձինք, որոնց գույքի ավելացումը եւ (կամ) պարտավորությունների նվազումն էականորեն գերազանցում է նրանց օրինական եկամուտները, եւ որը ողջամտորեն չի հիմնավորվում դրանցով: Նախատեսվում է, որ այդ պաշտոնյաները որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից կզրկվեն առավելագույնը երեք տարի ժամկետով, իսկ նրանց գույքը կբռնագրավվի:
Սույն հոդվածում էական է համարվում հանցագործության պահին սահմանված նվազագույն աշխատավարձի հինգհազարապատիկը գերազանցող գումարը /արժեքը/:
Ընդունման դեպքում օրենքն ուժի մեջ է մտնելու 2017 թվականի հուլիսի 1-ից: