«Ալյանս» անունը կրող հզոր կուսակցության նախագահ, ՀՀ ԱԺ պատգամավոր Տիգրան Ուրիխանյանն իրեն նոր զբաղմունք է գտել: Այս անգամ նա պայքարի մեջ է մտել իր սեփական` ԱԺ ԲՀԿ խմբակցության ղեկավար Նաիրա Զոհրաբյանի դեմ: Նա խոստանում է կազմակերպել Զոհրաբյանի թաղումը և վստահ է, որ դա կստացվի, քանզի մեկ անգամ կնոջ թաղում կազմակերպելը նրան հաջողվել է (խոսքն Անի Հովհաննիսյանի մասին է, որն առ այսօր կալանքի տակ է): Պրն Ուրիխանյանը գրում է.
«Կազմակերպելու եմ ժողովրդին ու թիմակիցներին դավաճանած պատգամավորի քաղաքական թաղումը: Շատ կոնկրետ մի կին բախտի ու հանգամանքների բերմամբ, ինչպես նաև դավաճանելու, կեղտոտ ինտրիգներ հյուսելու, լկտիաբար ստելու և թիմակիցներին ու ղեկավարներին զոհաբերելու արդյունքում տարիներ առաջ հայտնվեց Ազգային ժողովում բարձր կարգավիճակում, քանդեց ամեն ինչ, ինչի հետ առնչվեց, դավաճանեց բոլորին, ում հետ առնչվեց, կոպտորեն խաբեց ժողովրդին և առաջացրեց բոլորի զզվանքը սեփական անպարկեշտության նկատմամբ: Այդ ամենի արդյունքը միայն նրա հաշվեհամարին ավելացող գումարն է: Երկար ժամանակ ձև եմ արել, որ չեմ նկատում տակից արված նրա հարվածները, ուղղորդված լրագրողներ մոտս ուղարկելը, պատվիրված հոդվածներ կազմակերպելը, գործընկերների մոտ վատաբանելն ու ստեր տարածելը: Բայց երբ հանդգնեց, ինչպես արդեն ապացուցվել է, անձնական վիրավորանքներ տարածել իմ ու մերձավորներիս նկատմամբ, օգտագործեց կնոջն ու հային անվայել մեթոդներ, այդտեղ հատեց համբերության սահմանը: Հիմա էլ սկսել է ֆեյքերի միջոցով զառանցել սոցիալական ցանցերում, սակայն, շուտով կազմակերպելու եմ նրա քաղաքական թաղումը բոլոր բացահայտումներով, որ հանրությունը մինչև վերջ գիտակցի նրա էությունը, իսկ Աստված ազատի մեր երկիրը այդպիսի պատգամավորներից: Հ.Գ. Սովորաբար, ինչպես գիտեք, իմ բացահայտումներից հետո հարուցվում են քրեական գործեր մարդկանց կամ պետությանը պատճառված վնասի և այլ հանցակազմի առկայությամբ, ժողովուրդն իմանում է ամեն ինչ, իսկ արդարությունը վերականգնվում է»:
Այն, որ Նաիրա Զոհրաբյանի հետևից ընկել է Տիգրան Ուրիխանյանը, մենք բնական ենք համարում, քանզի տիկին Զոհրաբյանը բավական կասկածելի անձնավորություն է: Բանն այն է, որ նա տարբերում է արձակը պոեզիայից, դա էլ քիչ է` գրականությունն էլ կերպարվեստից, ինչը խիստ հակասում է Երրորդ Հանրապետության պառլամենտարիզմի ոգուն և էությանը: Իսկ սա նշանակում է, որ Նաիրա Զոհրաբյանը պետք է միշտ հայտնվի տարօրինակ պատմությունների մեջ, քանզի դա է կասկածելի մարդկանց ճակատագիրը: Բայց տիկին Զոհրաբյանի թաղումը դժվար թե տեղի ունենա, քանզի կա Հայաստանում քրեական օրենսգիրք, որը պարունակում է հոդվածներ, որոնք հատուկ գրված են Տիգրան Ուրիխանյանի համար: Մասնավորապես, 223-րդ հոդվածն ասում է.
«Հանցավոր համագործակցություն ստեղծելը կամ հանցավոր համագործակցությանը մասնակցելը
1. Հանցավոր համագործակցություն ստեղծելը կամ հանցավոր համագործակցությանը մասնակցելը պատժվում է ազատազրկմամբ` 8-12 տարի ժամկետով`գույքի բռնագրավմամբ կամ առանց դրա:
2. Հանցավոր համագործակցությանը մասնակցելը՝ պատժվում է ազատազրկմամբ` 6-10 տարի ժամկետով` գույքի բռնագրավմամբ կամ առանց դրա:
3. Սույն հոդվածի առաջին կամ երկրորդ մասով նախատեսված արարքները պաշտոնեական դիրքն օգտագործելով կատարելը` պատժվում է ազատազրկմամբ` 10-15 տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը 3 տարի ժամկետով` գույքի բռնագրավմամբ կամ առանց դրա»: Իսկ 41-րդ հոդվածում գրված է.
«2. Հանցանքը համարվում է մի խումբ անձանց կողմից նախնական համաձայնությամբ կատարված, եթե դրան մասնակցել են այնպիսի համակատարողներ, ովքեր նախապես` մինչև հանցագործությունը սկսելը, պայմանավորվել են հանցանքը համատեղ կատարելու մասին:
3. Հանցանքը համարվում է կազմակերպված խմբի կողմից կատարված, եթե դա կատարվել է այնպիսի անձանց կայուն խմբի կողմից, ովքեր նախապես միավորվել են մեկ կամ մի քանի հանցանքներ կատարելու համար»:
Բանն այն է, որ Քննչական կոմիտեի Երևանի վարչությունը Shame.am-ի խմբագիր Արտյոմ Խաչատրյանի հետ կատարված դեպքի առիթով հարուցված քրեական գործերն ուղարկել է հատուկ քննչական ծառայություն: Սա նշանակում է, որ նախաքննությունը մտադիր է մեղադրանք առաջադրել Տիգրան Ուրիխանյանին վերը նշված հոդվածներով: Սա նաև նշանակում է, որ պետությունը, հանձինս իր ղեկավարության, այլևս չի հանդուրժում պրն Ուրիխանյանին: Վերջապես, սա նշանակում է, որ Նաիրա Զոհրաբյանը գրեթե փրկված է` նրա թաղումը պարզապես տեղի չի ունենա:
Հետգրություն
Կարծում ենք, շատ շուտով Ուրիխանյանին կդադարեն հանդուրժել իր իսկ շրջապատը և հանցակիցները: Քանզի այսպիսին է դեպքերի զարգացման տրամաբանությունը: Համենայն դեպս, դրա նախադրյալներն արդեն նշմարվում են...
Աղբյուրը՝ shame.am
