Գույներ, համադրություններ, հակադրություններ. այսպես բնորոշեցին հայրենական նորաձևության հիմնադիրներից մեկի՝ Լիլիթ Մարգարյանի «Gallery 100» նոր հավաքածուն, որը նվիրված էր Հայոց ցեղասպանության 100-ամյա տարելիցին և ներկայացվեց «Meridian Expo Centre»-ում:
Հավաքածուի հիմքում հայ կնոջ կերպարն էր ու նրա ոճի զարգացումը, որն ուղեկցվել է պատմական և տարածքային բազմազան գործոնների ազդեցությամբ:
Դիզայները կատարելության է հասցնում 1915ին վերապրած հայ կինանհատին, ով ոչ միայն կարողացել է պահպանել բարոյական բարձր արժեքները, այլև գեղարվեստի մեծ վարպետների սերունդ է դաստիարակել: Հավաքածուի հիմնական նմուշները զգեստներն են, որոնք 20րդ հարյուրամյակի հայ նկարիչների ստեղծագործություններից ոգեշնչվելու արդյունք են:
Լիլիթ Մարգարյանի հավաքածուի հիմքում Սարյանի, Հակոբյանի, Կալենցի, Գառզուի և այլ մեծանուն նկարիչների փորագրանկարներն են:
Միջոցառումն անցկացվեց ՀՀ առաջին տիկին Ռիտա Սարգսյանի աջակցությամբ: Միջոցառման իրականացմանը նպաստել էր նաև ՀՀ սփյուռքի նախարարությունը:
Ներկայացվող ցուցադրության առանձնահատկություններից էին ոսկերիչ դիզայներ Նուռի՝ հատուկ այս ցուցադրության համար ստեղծած աքսեսուարները, որոնք զարդարում էին հավաքածուի նմուշները:
«Հայ ազգն ունի հարյուրավոր տաղանդավոր նկարիչներ: Որոշեցի, որ հայ կինը միշտ տանջված չի եղել: Գտա ազնվազարմ, բարձրաճաշակ կանանց նկարներ: Որոշեցի սկսել այդտեղից. ինչպիսի՞ն է եղել հայ կինը և ի՞նչ պատահեց նրա հետ: Հայ կինը հայրենակորույս եղավ, բայց չդավաճանեց հայրենիքը»,-լրագրողների հետ զրույցում ասաց հավաքածուի հեղինակ Լիլիթ Մարգարյանը:
ՀՀ սփյուռքի նախարար Հրանուշ Հակոբյանն էլ խոսելով ցուցադրության մասին, ասաց.«Տեսանք գույներ, համադրություններ, հակադրություններ: Տեսանք մեր հզոր նկարիչներից վերցված գույներ և ձևեր: Կարծում եմ, որ ցուցադրությունը ստացվեց: Միշտ չէ, որ հնարավոր է այսքան խստապահանջ հանդիսատեսին 100 զգեստ ներկայացնելը: Ուրախ եմ, որ մեր նորաձևության մեծերը «ձեռք են մեկնում» մեր նկարիչ մեծերին»։
Նա նշեց, որ ցուցադրության համար հատկացվել է 3 միլիոն դրամ:
Ներկայացվեց մի ամբողջ դարաշրջան՝ մարմնավորված թափանցիկ շիֆոնի ծփանքներով, նրբերանգ քաշմիրով, կաշվե ժանյակներով ու մանեկեններով: