Արդեն հայտնել ենք այն մասին, որ երեկ բելոռուսական կողմը հայտնի բլոգեր Ալեքսանդր Լապշինին արտահանձնեց Ադրբեջանին և վերջինս արդեն գտնվում է այդ երկրի Արդարադատության նախարարության մեկուսարանում: Տեղի ունեցածի մասով հայտարարություններ են տարածել ՀՀ ԱԳՆ-ն, ՀՀ ՄԻՊ-ը, Արցախի ՄԻՊ-ը և այլն:
Լապշինի մասին այսօր խոսեցին նաև ԱԺ-ում: Մասնավորապես ԱԺ պատգամավոր Խաչատուր Քոքոբելյանը հայտարարեց, որ չպետք է սահմանափակվել այստեղ-այնտեղ տեղի ունեցածի մասին խոսելով և ԱԺ-ն իր դիրքորոշումը պետք է հայտնի:
ԱԺ փոխխոսնակ Էդուարդ Շարմազանովը, պատասխանելով Քոքոբելյանին, ասաց, որ արդեն հայտնել է Հայ-բելոռուսական համագործակցության հանձնաժողովի դիրքորոշումը. «Սա խայտառակ քայլ է, որն ուղղված է Հայաստանի, Ռուսաստանի և խաղաղ կարգավորման դեմ: Որևէ ժողովրդավարական ռեժիմ նման քայլ չէր կարող անել: Սա կեղտոտ գործարք է»:
ԱԺ պատգամավոր Նիկոլ Փաշինյանն իր հերթին բոլորին ժամը 15:00-ին հրավիրեց Բելոռուսի դեսպանատան մոտ հայկական կողմի բողոքի ձայնն արտահայտելու համար: Նա նաև տեղի ունեցածը հավասարեցրեց Հունգարիայի կողմից Ռամիլ Սաֆարովին Ադրբեջանին հանձնելու հետ. «Մենք պետք է ետ կանչենք Բելոռուսում մեր դեսպանին»:
Կոշտ քայլերի մասին խոսեցին նաև իշխանական պատգամավորները՝ համաձայնելով Փաշինյանի առաջարկի հետ և դատապարտելով բելոռուսական կողմի քայլը:
«Հայ հանրության առջև ՀԱՊԿ-ը և ԵՏՄ-ն սկսում են արժեզրկվել»,-ասաց Սամվել Ֆարմանյանը:
ՀՀԿ խմբակցության ղեկավար Վահրամ Բաղդասարյանն նշեց, թե սա առաջին դեպքը չէ, որ Բելոռուսը կողմանակալ դիրքորոշում է ունենում: Նա նաև առաջարկեց բարձրացնել ոչ թե Հայաստանի, այլ՝ Բելոռուսի՝ ՀԱՊԿ-ից դուրս գալու հարցը:
Ելույթ ունեցան տասնյակից ավել պատգամավորներ: Բոլորը կոչ արեցին հստակ քայլերով պատասխանել բելոռուսական կողմին և հայտնել հայկական կողմի դիրքոշորումը: