Այսօր բացվել է «Զվարթնոց» օդանավակայանի ոստիկանության գծային բաժնի նոր շենքը։ Այս մասին հայտնում են ՀՀ ոստիկանության մամուլի ծառայությունից՝ նշելով, որ ՀՀ ոստիկանության պետ Վլադիմիր Գասպարյանն մասնակցել է բացմանը և մի շարք այլ միջոցառումների:
Ոստիկանության կրթահամալիրում կազմակերպված միջոցառմանը մասնակցել են ԵԱՀԿ երևանյան գրասենյակի ղեկավար, դեսպան Անդրեյ Սորոկինը, ոստիկանության բարձրաստիճան պաշտոնյաներ, Արցախյան ազատամարտում և ծառայության ժամանակ զոհված ոստիկանների հարազատներ, բազմաթիվ հյուրեր:
Հարգանքի տուրք է մատուցվել զոհված ոստիկաննների կոթողին:
Այնուհետև տեղի է ունեցել Ցեղասպանության զոհերի հուշակոթողի բացման արարողությունը:
Կրթահամալիրի սուրբ Վարդան Մամիկոնյան մատուռի մոտ Կոտայքի թեմի առաջնորդ Գերաշնորհ տեր Առաքել եպիսկոպոս Քարամյանը պատարագ է մատուցել Ցեղասպանության զոհերի հիշատակին, իսկ երգչախումբը հնչեցրել է «Հայր մերը»։
Ոստիկանության պետը եղել է նաև կրթահամալիրի նորաբաց մինի-ֆուտբոլի խաղադաշտում: Նա գոհունակություն է հայտնել ձեռնարկման կապակցությամբ և «Համագործակցության ամրապնդման համար» մեդալով պարգևատրել մոսկվայաբնակ բարերար Արտակ Թովմասյանին՝ այդ գործին աջակցելու համար:
Ոստիկանության կրթահամալիրի շարահրապարակում տեղի է ունեցել կրթահամալիրի դրոշի հանձնման արարողությունը: Գերաշնորհ տեր Առաքել եպիսկոպոս Քարամյանը օծել է դրոշը, ապա ոստիկանության պետ Վլադիմիր Գասպարյանն այն հանձնել է կրթահամալիրի պետին:
Հաջորդ կանգառը ոստիկանության զորքերի 1033 զորամասում էր, որտեղ Վլադիմիր Գասպարյանը մասնակցել է Ցեղասպանության զոհերի հիշատակը հավերժացնող հուշակոթողի բացմանը:
