Ադրբեջանի պաշտպանության նախարարությունը հայտնում է, որ հայ-ադրբեջանական սահմանին տեղի ունեցած փոխհրաձգության արդյունքում ադրբեջանական բանակը զոհ ունի:
Նշվում է, որ զինծառայող Ահմեդով Էլվին Սուլեյմանով ծանր վիրավորվել է, նրան տեղափոխել են հոսպիտալ, սակայն վերջինիս կյանքը փրկել չի հաջողվել:
Ավելի վաղ Արցախի Հանրապետության պաշտպանության բանակը հայտարարություն էր տարածել` նշելով, որ փետրվարի 27-ին և լույս 28-ի գիշերը արցախա-ադրբեջանական հակամարտ զորքերի շփման գծի ողջ երկայնքով հակառակորդը հրադադարի պահպանման ռեժիմը խախտել է ավելի քան 120 անգամ, որի ընթազցքում, հայ դիրքապահների ուղղությամբ, արձակել է շուրջ 2200 կրակոց: Առավել ինտենսիվ խախտումներ են արձանագրվել արևելյան և հյուսիսային ուղղություններում: Նշված հատվածներում ադրբեջանական զինուժը 60 և 82 միլիմետրանոց ականանետերից հայ դիրքապահների ուղղությամբ արձակել է ընդհանուր առմամբ 15 արկ:
ՊԲ առաջապահ զորամասերը լիարժեք վերահսկողություն են պահպանում առաջնագծում և շարունակում վստահորեն իրականացնել մարտական հերթապահություն:
