Ավստրալիայի Ռայդ քաղաքը ապրիլի 16-ին Հայոց ցեղասպանությանը նվիրված միաձայն բանաձև է ընդունել: Այս մասին հաղորդում է Ավստրալիայում Հայ դատի հանձնախումբը:
Ռայդ քաղաքի խորհուրդը 10 տարի առաջ դարձավ Ավստրալիայի առաջին տեղական խորհուրդը, որը 1915-1923 թվականների դեպքերը ճանաչեց որպես Հայոց ցեղասպանություն: 10 տարի անց ընդունված բանաձևով հարգանքի տուրք է մատուցվում 1.5 մլն զոհերի հիշատակին:
Բանաձևի նախագիծը, ինչպես 10 տարի առաջ, ներկայացրել է քաղաքային խորհրդի անդամ Սարգիս Եդելյանը: Քննարկման ժամանակ ելույթ են ունեցել Ռայդի հայ համայնքի բազմաթիվ ներկայացուցիչներ:
«Հաշվի առնելով, որ 2015-ին լրանում է 10 տարին այն օրվանից, երբ Ռայդի խորհուրդն ընդունեց Ցեղասպանությունը ճանաչող բանաձև, այսօր Խորհուրդը միանում է Ավստրալիայի հայ համայնքին` ոգեկոչելով Հայոց ցեղասպանության 100-րդ տարելիցը», - ասվում է բանաձևում:
