Ապրիլի 25-ին` ուշ երեկոյան, Չեխիայի Հանրապետության խորհրդարանից ստացվել է հաղորդագրություն, որի համաձայն, ստորին պալատը` Պատգամավորների խորհուրդը, 104 կողմ, 0 դեմ քվեների հարաբերակցությամբ ընդունել է բանաձև, որով, փաստորեն, ճանաչել է Հայոց ցեղասպանությունը։
Խորհրդարանը թիվ 413 բանաձևով «դատապարտել է Երկրորդ աշխարհամարտի տարիներին հրեաների, գնչուների և սլավոն բնակիչների նկատմամբ հանցագործությունները, Առաջին աշխարհամարտի տարիներին հայերի և ազգային ու կրոնական այլ փոքրամասնությունների ցեղասպանությունը Օսմանյան կայսրության տարածքում, ինչպես նաև Երկրի ցանկացած այլ շրջանում կատարված ցեղասպանությունները»։
Չեխիայի խորհրդարանի ստորին պալատը միջազգային հանրությանը կոչ է անում ձեռնարկել անհրաժեշտ միջոցներ` մարդու և հասարակության իրավունքների ոտնահարումը կանխելու և առկա վեճերը բացառապես խաղաղ եղանակներով կարգավորելու համար։
Մանրամասն` azatutyun.am
