ԱԺ «Ելք» խմբակցության պատգամավոր Մանե Թանդիլյանը «Analitik.am» լրատվական կայքի տնօրեն Անի Հովհաննիսյանի դատավարության հետ կապված խնդրահարույց դրույթներ է տեսնում: Նա Tert.am-ի հետ զրույցում ասաց, թե իր կարծիքով ներպետական ատյանները սպառելուց հետո դատավճռի մասով հանգուցալուծումը կլինի Եվրոպական դատարանում, և իր համար ակնհայտ է, որ Հայաստանը տանելու է ևս մեկ պարտության ՄԻԵԴ-ում: Միաժամանակ Թանդիլյանը շեշտեց՝ քանի դեռ գործն ավարտին չի հասել, իր մոտեցումը զուտ կարծիք է համարվում:
«Անիի գործով ծանրացուցիչ հանգամանք կար, որով նրա խափանման միջոցը կալանք էր ընտրվել, այդ գործով Անին արդարացվել է, սակայն նրան շարունակեցին կալանքի տակ պահել: Ըստ էության՝ դրանք շինծու փաստարկներ էին, որոնց նպատակն Անիին կալանքի տակ պահելն էր այնքան ժամանակ, քանի դեռ դատավարությունն ընթանում էր: Այնինչ Անին կարող էր լինել ազատության մեջ, տեղի կունենար դատավարությունը: Եթե նա ազատության մեջ լիներ, ապա դատարանը ստիպված չէր լինի նրան տալ դատական այնպիսի որոշում, ըստ որի Անին կբանտարկվեր 1.5 տարվա ազատազրկման»,- ասաց Թանդիլյանը:
Պատգամավորի գնահատմամբ՝ դատարանն այնպիսի վճիռ է կայացրել, որ արդարացնի Անի Հովհաննիսյանի խափանման միջոցը կալանք ընտրելը և երկարաձգելը: Մանե Թանդիլյանը նկատեց, որ խափանման միջոցը կալանք ընտրելու մասով ՄԻԵԴ-ը նույնպես փոխել է իր դիրքորոշումը:
Մանրամասն՝ tert.am
