«Ես համարում եմ, որ Անի Հովհաննիսյանին կալանքի տակ պահելով փորձել են այդկերպ նրան ստիպել ընդունել բաներ, որոնք ինքը գտնում է, որ չի արել: Այսինքն ասեր, որ արել է ինչ-որ բան հանուն այն բանի, որպեսզի ազատվի կալանքից », -այսօր՝ հոկտեմբերի 2-ին, տեղի ունեցած մամուլի ասուլիսի ժամանակ ասաց ԱԺ պատգամավոր Մանե Թանդիլյանը՝ խոսելով Analitik.am կայքի խմբագիր Անի Հովհաննիսյանի գործի մասին և հավելելով՝ ինքն այցելել է այդ վայրեր և կարծում է, որ այնտեղ գտնվելն անգամ հոգեբանական լրջագույն ճնշում է:
Տիկին Թանդիլյանը նշեց, որ իշխանությանը վերահսկելու և ժողովրդավարության կայացման գործում լրագրողներին համարում է կարևորագույն օղակ, ինչի համար է նաև սկսել է հետաքրքրվել այս գործով:
Հարցին, թե ինչ ունեն անելու այդստեղ ՀՀ ՄԻՊ-ը և իրավապաշտպան կազմակերպությունները, ԱԺ պատգամավորն ասաց. «Ես այս գործի մասին իմացել եմ պատահաբար և զարմացել, թե ինչու իրավապաշպան կազմակերպությունները չեն բարձրաձայնել այս մասին: Ես հասկանում եմ, որ կան շահեր, սակայն որևէ շահ չի կարող ավելի կարևոր լինել այն սկզբունքներից, որոնց կրողը ես եմ: Ես ցանկանում եմ, որ մեր պետությունը լինի այդ արժեքների կրողը: Ինչ վերաբերում է ՄԻՊ-ի հարցին, ապա ես չեմ լսել որևէ հայտարարություն վերջինիս կողմից, չգիտեմ՝ նման հայտարարություն կա, թե՝ ոչ: Ամեն դեպքում կարող եմ ասել, որ այս թեման պատշաճ կերպով չի լուսաբանվել»:
Ասուլիսի վերջում տիկին Թանդիլյանը նաև ասաց, որ ինքը մնչև վերջ հետաքրքրվելու է Անի Հովհաննիսյանի գործով:
