Ղազախստանը 2,7 միլիարդ դոլարի պայմանագրեր է կնքել ամերիկյան ընկերությունների հետ: Այս մասին ասված է Սպիտակ տան կայքում հրապարակված հայտարարության մեջ, որը տարածվել է ԱՄՆ և Ղազախստանի նախագահներ Դոնալդ Թրամփի և Նուրսուլթան Նազարբաևի հանդիպումից հետո:
Հանդիպումը տեղի է ունեցել հունվարի 16-ին:
Նոր պայմանագրերը կնքվել են ամերիկյան Boeing, GE Transportation, GE Digital, Chevron ընկերությունների ու ղազախական Air Astana, Scat Airlines և այլ ընկերությունների միջև:
Օրինակ պայմանագրերից մեկով SCAT Airlines ավիաընկերությունը 6 միավոր Boeing-737 MAX 8 ինքնաթիռ ձեռք կբերի:
Նազարբաևն ԱՄՆ-ում գտնվելու է մինչև հունվարի 18-ը: Նրա խոսքերով, այդ ընթացքում ամերիկյան ընկերությունների հետ 7,5 միլիարդ դոլարի պայմանագիր է ստորագրվելու: Դրանք լինելու են էներգետիկայի, առևտրի, գյուղատնտեսության, առողջպահության, թվային ենթակառուցվածքների ոլորտներում:
