Սիրիական Արֆին շրջանում թուրքական հարվածներից 8 խաղաղ բնակիչ է զոհվել: Այս մասին, ինչպես գրում է Ինտերֆաքսը, լրագրողներին հայտնել է քրդական ինքնապաշտպանական ուժերի ներկայացուցիչ Բիրուսք Հասակին:
Սիրիացի իրավապաշտպանների տեղեկություններով, զոհերը մեկ ընտանիքի անդամներ են: Ընդհանուր առմամբ, թուրքական հարվածների արդյունքում զոհվել է 11 խաղաղ բնակիչ:
Թուրքիայի արտգործնախարարությունը հերքել է վերոնշյալ ինֆորմացիան, իսկ թուրքական զինված ուժերում հայտարարել են, թե իբր անում են ամեն ինչ խաղաղ բնակչության շրջանում զոհերից խուսափելու համար:
Նշենք, որ թուրքական ուժերը սիրիական տարածքը սկսեցին հրետակոծել հունվարի 20-ին, իսկ արդեն հունվարի 21-ին օպերացիան մեկնարկեց ցամաքային ուժերի համար: Մասնավորապես խոսքը վերաբերում է տանկերին և այլ ռազմական տեխնիկային:
Ավելի վաղ ամերիկյան իշխանությունները կոչ էին արել Անկարային զսպվածություն ցուցաբերել, սակայն այդ կոչը անպատասխան էր մնացել:
Ֆրանսիայի արտաքաին գործերի նախարար Ժան-Իվ Լե Դրիանն իր հերթին հայտնել է, որ հունվարի 22-ին ՄԱԿ-ի ԱԽ-ն պատրաստվում է քննարկել այս հարցը:
