Տեղի ունեցավ նորաստեղծ «Լիբերալ ժողովրդական» կուսակցության հիմնադիր համագումարը, որի սկզբում կուսակցության նախագահ Դավիթ Հարությունյանը չպատասխանեց լրագրողների հարցերին՝ ասելով, թե համագումարի ընթացքում կտրվեն բոլոր հարցերի պատասխանները:
Համագումարը տևեց շատ կարճ: Որևէ հարցուպատասխան չեղավ:
Բացի երիտասարդ կուսակցականներից, նորաստեղծ կուսակցության համագումարին ներկա էին նաև «Ժողովրդավարական ուղի» կուսակցության նախագահ Մանուել Գասպարյանը և «Բարգավաճ Հայաստան» կուսակցության երիտասարդական թևի նախագահ, Ազգային ժողովի պատգամավոր Վահե Էնֆիաջյանը:
Ողջունելով համագումարի մասնակիցներին` Մանուել Գասպարյանն ասաց, թե նորաստեղծ կուսակցությունը և իրենք գտնվում են գաղափարական տարբեր ճամբարներում, սակայն դա չի խանգարում, որ նորաստեղծ կուսակցության հետ ուս-ուսի տալով լուծում գտնեն երկրում առկա խնդիրներին:
Իսկ ԲՀԿ-ական Վահե Էնֆիաջյանը հայտարարեց, թե իրենց համար շատ կարևոր է Հայաստանում տեղի ունեցող հասարակական և քաղաքական յուրաքանչյուր գործընթաց և նորաստեղծ կուսակցությանը ցանկացավ, որ իր առջև դրած խնդիրները տեղափոխի լուծման դաշտ:
Կուսակցության նախագահ Դավիթ Հարությունյանն իր խոսքում ասաց, թե ի սկզբանե նախաձեռնող խմբի գաղափարախոսությունն ու նպատակն է եղել հիմնել քաղաքական միավորում, որը հստակ լուծումներ գտնի և իրական մեխանիզմներ առաջարկի՝ ստեղծված բարոյահոգեբանական, սոցիալ-տնտեսական և քաղաքացիական լայն շերտերում առկա օրհասական խնդիրների հաղթահարելու համար:
«Մենք հիմնում ենք մի կուսակցություն, որի կորիզը երիտասարդությունն է, մենք հասնելու ենք մեր երազած Հայաստանի կառուցմանը»,-հայտարարեց Դավիթ Հարությունյանը:
Վերջում, սակայն, նորընտիր նախագահը չպատասխանեց որևէ հարցի. «Առանց մեկնաբանության»:
Սկզբնաղբյուրը` http://www.tert.am/am/news/2014/04/22/liberal-demo/
