Ես կարծում եմ, որ Հայաստանում գնաճ ոչ 2,6 տոկոս է, ոչ էլ 21,9 տոկոս, ինչպես ասաց պարոն Փաշինյանը: Հայաստանում այն կազմել է 40 և ավելի տոկոս: Այսօր խորհրդարանում Հարկային օրենսգրքում փոփոխությունների հարցի քննարկման ժամանակ հայտարարեց ԱԺ Ծառուկյան դաշինքի պատգամավոր Վարդան Բոստանջյանը:
Նրա խոսքերով, երկրում վիճակը վատ է. «Ի՞նչ անենք, որ այս իրավիճակից դուրս գանք: Իհարկե պետք չէ հուզվել ու ասել բյուջեում փող չկա: Չկա, ուրեմն լավ չենք աշխատում: Կարելի՞ է ժողովրդին սպանելով բյուջե լցնել ու էլի ռացիոնալ չօգտագործել»:
Հարցի հարակից զեկուցող ԱԺ տնտեսական հարցերի հանձնաժողովի նախագահ Խոսրով Հարությունյանի խոսքերով, պետք է առաջնորդվել պարենային զամբյուղում ներառված 11 անուն ապրանքատեսակների գնաճով, որը կազմում է 5,8 տոկոս, և եթե փոխհատուցման խնդիր լինի, անել դա սրանից ելնելով. «Ինչ վերաբերում է նրան, թե ինչ պետք է անել: Այս խնդիրը կարճաժամկետ լուծում չունի: Ամենակարևորը տնտեսական աճն է, այլ հնարավորություն չկա»:
Հենց այս նպատակով էլ, պատգամավորի խոսքերով, անցում է կատարվում ծրագրային բյուջետավորման համակարգին, որպեսզի միջոցները ռացիոնալ օգտագործվեն: Մյուս կողմից, նա խոսեց կառավարության կառուցվածքային խնդիրների և կրճատումների մասին:
Բոստանջյանն իր հերթին նշեց, որ փոփոխությունները կարճաժամկետ գործընթաց չեն և ցանկություն հայտնեց, որ ժողովորդը տեսնի այդ փոփոխությունների մեկնարկը:
