Գիտությունների ազգային ակադեմիայի արևելագիտության ինստիտուտի տնօրեն, թուրքագետ Ռուբեն Սաֆրաստյանի կարծիքով, սիրիական հակամարտության կողմերը ցանկանում էին խաղաղ ճանապարհով լուծել խնդիրը, սակայ Թուրքիայի բացահայտ օկուպացիան խախտեց այդ մտադրությունը:
Նշենք, որ խոսքը վերաբերում է հունվարի 20-ին մեկնարկած սիրիական Աֆրինի թուրքական ռազմական օպերացիային, որը թուրքական կողմի հայտարարությունների համաձայն, շարունակվելու է սիրիական Մանբիջում:
Սաֆրաստյանի խոսքերով, թուրքական իշխանությունները ցանկանում են անվտանգության գոտի ստեղծել Սիրիայի հետ ամբողջ սահմանին, ինչի մասին ոչ մեկ անգամ է հայտարարվել: Եթե դա տեղի ունենա, աշխարհն ականատես կլինի Թուրքիայի կողմից իրականացված նոր ցեղասպանությանը, քանի որ իր նպատակին հասնելու համար Անկարան նշված տարածքը պետք է մաքրի քրդերից:
Թուրքագետը կարծիք հայտնեց, որ այս պայքարում քրդերն օգտագործվում են ամերիկացիների կողմից և կարող են առևտրի սեղանի վրա հայտնվել, ինչը զգում են նաև հենց քրդերը, որոնք սկսել են արդեն դժգոհություններ հայտնել՝ կապված ԱՄՆ քայլերի հետ:
Ինչ վերաբերում է ԱՖրինում ընթացող օպերացիային և առհասարակ սիրիական հակամարտությանը մասով Հայաստանի դիրքորոշմանը, Սաֆրաստյանը նշեց, որ Հայաստանն այնտեղ անելու բան չունի, չպետք է խաղերի մեջ մտնել, որի խաղացողները մեծ նպատակներ ունեն: Երևանը, թուրքագետի խոսքերով, կարող է միայն օգնել մեր հայրենակիցներին:
