Խորհրդարանում պատգամավորները սկսել են իրենց հարցերն ուղղել ՀՀ 4-րդ նախագահի թեկնածու Արմեն Սարգյանին:
ՀՀ նախագահի թեկնածուին դիմելով՝ ԱԺ ԵԼՔ խմբակցության պատգամավոր Մանե Թանդիլյանը ցանկացավ իմանալ՝ արդյո՞ք վերջինիս չի մտահոգում այն, որ երկրորդ թեկնածու չկա, որի դեպքում իրական դեբատների հնարավորություն կլիներ:
Բացի դրանից, Թանդիլյանը հարց բարձրացրեց՝ արդյո՞ք Արմեն Սարգսյանը տեսնում է իրեն ՀՀԿ-ի ցուցակը գլխավորողի դերում՝ հավակնելով դառնալ վարչապետ:
ԵԼՔ խմբակցության պատգամավորի երրորդ հարցը վերաբերում էր Սարգսյանի քաղաքացիությանը. «Արդյո՞ք բարդ էր ներկայացնել անհրաժեշտ փաստաթղթերը, որ Դուք ՀՀ քաղաքացի եք: Դա թույլ կտար ապահովել թափանցիկություն»:
Առաջին հարցի մասով ՀՀ նախագահի թեկնածուն նշեց, որ Սահմանադրությունն ինքը չի գրել, ընդամենը քվեարկել է և չգիտի, թե ինչպես պետք է առաջադրվեր մյուս թեկնածուն կամ թեկնածուները, եթե նման հարց լիներ: Սարգսյանի խոսքերով, հարցն իրեն ուղղել պետք չէ. «Ինչ վերաբերում է ԵԼՔ-ի թեկնածու Արտակ Զեյնալյանին, ես նրա նկատմամբ խորին հարգանք ունեմ: Հանդիպել եմ Զեյնալյանի հետ, լսել եմ նրան և եթե ընտրվեմ նախագահ, կաջակցեմ նրա մտքերին»:
Երկրորդ հարցի մասով Սարգսյանն ասաց, որ չի պատրաստվում դառնալ որևէ կուսակցության անդամ, նույնիսկ Նիկոլ Փաշինյանի Քաղաքացիական պայմանագրի:
Ինչ վերաբերում է իր քաղաքացիության մասով փաստաթուղթ ներկայացնելուն, Սարգսյանն ասաց, որ ներկայացրել է բոլոր փաստաթղթերը, որոնք պահանջել են իրենից. «Ես արդարանալու բան չունեմ, 2011 թվականի դեկտեմբեր 2-ից ՀՀ քաղաքացի եմ»:
