Մոսկվայի Նիկուլինյան դատարանը քրեական հեղինակություն Զախարիա Կալաշովին (Շաքրո Մոլոդոյ) մեղավոր է ճանաչել՝ շորթման մեղադրանքով և դատապարտել նրան 9 տարի 10 ամիս ժամկետով խիստ ռեժիմով ազատազրկման: Այս մասին հայտնում է Ինտերֆաքս գործակալությունը: Դատավճռի հրապարակումը սկսվել էր երկու օր առաջ:
Դատավճռում նշվում է, որ Կալաշովը կազմակերպված հանցավոր խմբի հետ բռնություն գործադրելու միջոցով և սեփականություն հափշտակելու նպատակով կատարել է առանձնապես խոշոր չափի շորթում:
Դատարանը հաստատված է համարել այն, որ 2013-ին Կալաշովը Ասլան Ուսոյանի (Դեդ Հասան) մահից հետո Ռուսաստանի քրեական աշխարհում ղեկավար դիրք է զբաղեցրել և հովանավորել է հանցավոր գործունեությամբ զբաղվող մարդկանց: Դատարանը մեղավոր է ճանաչել նաև Կալաշովի օգնական Անդրեյ Կոչույկովին (Իտալիանեց), ով դատապարտվեց 8 տարի 10 ամիս ժամկետով ազատազրկման:
Նշենք, որ ՌԴ Գլխավոր դատախազությունը պահանջել էր Կալաշովին դատապարտել խիստ ռեժիմով 10 տարի ազատազրկման, ինչպես նաև բռնագանձել 700 հազար ռուբլի, Կոչայկովին՝ խիստ ռեժիմով 9,5 տարի ազատազրկում և 500 հազար ռուբլի բռնագանձում:
