«Երբ մենք ՀՀ ժողովրդին կհրավիրենք հրապարակ՝ Սերժ Սարգսյանին հեռացնելու համար, վերջինս 10 օրվա ընթացքում պետք է հեռացած լինի»,-այսօր՝ մարտի 30-ին, մամուլի ասուլիսի ժամանակ հայտարարեց ԱԺ ԵԼՔ խմբակցության ղեկավար Նիկոլ Փաշինյանը՝ հավելելով, որ մարտի 31-ին հրապարակելու են իրենց ճանապարհային քարտեզը, և դրանից ուղիղ 10 օր հետո Սերժ Սարգսյանն իշխանությունից հեռացած կլինի:
Փաշինյանի խոսքերով, ապրիլի 10-ին գործող նախագահն արդեն իշխանություն չի ունենալու, և իրենց խնդիրն է անել այնպես, որ վերջինս չվերադառնա:
«Ապրիլի 9-17-ը Սերժ Սարգսյանը պետական պաշտոն չի ունենալու, ՀՀ-ում կառավարություն չի լինելու, պաշտոնակատարներ են լինելու: Արմեն Սարգսյանը ստանձնելու է պաշտոնը, սակայն ոչ մի գործառույթ չի ունենալու ուժային կառույցների վրա: Նույնը վերաբերում է նաև ԱԺ-ին: Ամենագործուն ուժը լինելու է ՀՀ քաղաքացին, ով եթե որոշի հաղթել, կհաղթի: Ես ինձ համարում եմ դրա երաշխավորողը»:
Փաշինյանը նաև կեսկատակ-կեսլուրջ նշեց, որ հույս ունի մեկնարկելիք պայքարի ժամանակ նոր բաներ սովորել: Երբ լրագրողներից մեկը նշեց, թե ինչ են անելու հնարավոր պայքարի մասնակիցները, եթե հանկարծ իրավապահները որոշեն ցրել հավաքվածներին՝ դիմելով օրինակ ջրցանների օգնությանը, միացնեն դրանք և Փաշինյանը մի կողմ թռնի, վերջինս նշեց, որ հույս ունի թռչել սովորել:
Ընդդիմադիր պատգամավորը խոսեց նաև Հայաստանում ռուսական ռազմական ոստիկանության հայտնվելու մասին՝ հայտարարելով, որ պետք է զգույշ լինել, քանի որ մեր իշխանություններն ամեն տարի մեր ինքնիշխանությունից ինչ-որ բան են զիջում, և եթե պարզվի, որ ռուսական ռազմական ոստիկանությունը գործառույթներ է ունենալու նաև ռուսական ռազմաբազայի ցանկապատերից դուրս, դա կհամարվի անընդունելի:
Հիշեցնենք, որ նախագահի պաշտոնում Սերժ Սարգսյանի լիազորություններն ավարտվում են ապրիլի 9-ին:
