Ազգային ժողովը քննարկում է Առևտրի և ծառայությունների մասին ՀՀ օրենքում փոփոխություններ և լրացումներ կատարելու մասին նախագիծը:
Նախագծի հիմնական զեկուցող Տնտեսական զարգացման նախարարի տեղակալ Տիգրան Խաչատրյանը նշեց, որ օրենքով նպատակ է դրվում սահմանել այն ծառայությունների տեսակը, որոնց գործունեությունը լինելու է սահմանափակման ենթակա՝ դրանցից որոշների տեղակայման մասով կլինեն որոշակի պահանջներ, որոշների նկատմամբ էլ կլինեն պահանջներ գիշերային ժամերին լռությունը պահպանելու մասով:
Այսպես՝ նախատեսվում է կարաոկեները, դիսկոտեկները, հեստապարային ակումբները (սթրիփթիզ-ակումբներ), շոքեբաղնիքները, բաղնիքները, սաունաները դուրս բերել բազմաբնակարան շենքերի բնակելի կամ ոչ բնակելի տարածքներից, կրթական և պատմամշակութային հաստատությունների, վարչական շենքերի, բժշկական հաստատություների տարածքներից:
Բացի դրանից, այդ հաստատությունների գործունեության մասով համայնքներում որոշումը կայացնելու են համայնքների ղեկավարները, Երևանում՝ քաղաքապետը:
4-րդ կետով համայնքների ավագանին իրավունք կունենա որոշել, թե ինչ հեռավորության վրա են լինելու վերոնշյալ հաստատությունները բազմաբնակարան շենքերից:
5-րդ կետով պետական տուրքեր են սահմանվում այդ հաստատությունների գործունեության համար:
Ինչ վերաբերում է լռության ժամերին, ապա դրանք կարող են լինել 22:00-07:00, 23:00-07:00: Լռության մասով պահանջը խախտվելու դեպքում սահմանվում է պատասխանատվություն՝ տուգանք՝ նվազագույն աշխատավարձի 200-300-ապատիկի չափով, իսկ կրկնվելու դեպքում՝ մինչև 1 միլիոն:
Օրենքն ուժի մեջ է մտնելու ընդունվելուց անմիջապես հետո:
