Այս գիշեր մինչև Սիրիային հարված հասցնելը, Ֆրանսիան այդ մասին տեղյակ է պահել Ռուսաստանին: Այս մասին հայտարարել է երկրի Զինված ուժերի նախարար Ֆլորանս Փառլին՝ նշելով, թե դաշնակիցները հոգ են տարել, որ Մոսկվան տեղյակ լինի կատարվելիքի մասին:
Ֆրանսիացի նախարարի խոսքերով, Փարիզը չի ցանկանում սրել Սիրիայի իրավիճակը և առճակատման գնալ, ուղղակի նպատակ կա հասցված հարվածով խանգարել տեղի իշխանություններին հետագայում դիմել քիմիական զենքի օգնությանը:
Ավելի վաղ Ֆրանսիայի ԱԳ նախարարը ևս հայտարարել էր, թե դաշնակիցների գործողություններն ուղղված չեն Դամասկոսի դեմ:
Հավելենք, որ Սիրիայի բանակի տարածած հայտարարության համաձայն, այս գիշեր հասցված հարվածի արդյունքում զոհեր չկան: