Մոսկվայի դատարանը կալանք է դրել 1 միլիարդ ռուբլի յուրացնելու մեջ կասկածվող Ռոսգոսստրախ ընկերության նախկին փոխնախագահ Սերգեյ Խաչատուրովի հաշիվների վրա: Այս մասին հայտնում է ՏԱՍՍ գործակալությունը՝ հղում անելով քննությանը ծանոթ իր աղբյուրին:
Աղբյուրը հայտնել է, որ ընդհանուր առմամբ կալանք է դրվել 72 միլիոն դոլարի դրամական միջոցների և բաժնետոմսերի վրա:
Խաչատուրովի փաստաբան Ալեքսեյ Մելնիկովը գործակալության հետ զրույցում նշել է, որ վերջինիս դրամական միջոցները, որոնց մասով կալանքի որոշում է կայացվել, մի քանի անգամ գերազանցում են վնասը, որի մեջ գործարարը մեղադրվում է, իսկ իր պաշտպանյալի նկատմամբ կալանքը որպես խափանման միջոց ընտրելը չափազանց խիստ պատիժ է:
Հավելենք, որ մայիսի 3-ին Մոսկվայի դատարանն օրինական է ճանաչել Սերգեյ Խաչատուրովի նկատմամբ կալանքը որպես խափանման միջոց ընտրելու որոշումը:
