«Բոլորս հասկանում ենք, որ Հանրապետության հրապարակում կանգնածների գոնե մեծամասնությունը ընդամենը մեկ տարի առաջ եղել են 10 հազար դրամ կամ տվող, կամ վերցնող»,-այսօր՝ մայիսի 7-ին, լրագրողների հետ հանդիպման ժամանակ հայտարարեց քաղտեխնոլոգ Կարեն Քոչարյանը՝ հավելելով, թե մեծ հարց է, եթե լինի ընտրություն, այդ նույն մարդիկ կվերցնե՞ն գումար, թե՝ ոչ:
Քոչարյանը համոզմունք հայտնեց, որ գոնե մի մասը հաստատ էլի կվերցնեն. «Նրանք այսօր գոռում են «Նիկոլ վարչապետ», «Մերժիր Սերժին», սակայն դա ընդամենը փոփոխություն է լեզվի վրա, իսկ գլխում փոփոխությունը դեռ տեղի չի ունեցել: Նույնը կարող ենք ասել նաև քաղաքական ուժերի մասին. Արդյո՞ք քաղաքական ուժերը հասկանալու են, որ Հայաստանին պետք են ոչ թե մարգինալ մարդ-կուսակցություններ, այլ գաղափարական, համակարգային կառույցներ»:
Քաղտեխնոլոգի խոսքերով, եթե Հայաստանում չգնանք քաղաքական դաշտն ինստիտուցիանալացնելու ճանապարհով, մի քանի տարի հետո ունենալու ենք նույնը, ինչն ունեցանք 90-ականների վերջին. «Պետք է հասկանալ, որ «Պարույր Հայրիկյանի սինդրոմից» պետք է դուրս գալ, պետք չէ անընդհատ ասել «ես, ես,ես»»: