Եռաբլուրում, ուր այսօր Երկրապահի օրվա կապակցությամբ որոշ գործիչներ այցելել էին զոհվածների շիրիմներին (Երկրապահի օրը մայիսի 8-ին է), «Ելք» խմբակցության պատգամավոր Արամ Սարգսյանն անդրադարձավ նոր կառավարության կազմի ձևավորմանը: Նա նշեց, որ շատ դրական է վերաբերում, գերկարևոր, առաջնային կառույցների ղեկավարների նշանակումներին, քանի որ պատերազմող երկրի համար դրանք ուղղակի օրվա խնդիր են: «Պաշտպանության նախարարությունում միայն բանիմաց մարդ պետք է լինի, և Դավիթ Տոնոյանի նշանակումը ողջունելի է, նա փորձառու է, բոլոր առումներով ընդունելի և ընկալելի մարդ, որ հրաշալի գիտի թե՛ բանակը, թե՛ բանակի առաջ դրված խնդիրները»,-նշեց նա՝ ընդգծելով, որ միանշանակ կարծում է, որ ճիշտ ընտրություն էր և ամենակարևոր նշանակումն իր համար:
ԱԱԾ պետի նշանակման մասով նա ասաց, որ հեղափոխության արդյունքում փոփոխությունների գնացող երկրի համար դա ևս գերկարևոր է, և այստեղ էլ փորձառու մարդ է պետք:
Ինչ վերաբերոււմ է ոստիկանապետին, ապա, ըստ Սարգսյանի, Օսիպյանից ավելի շատ ներքին կյանքում «շան միս կերած» մարդ չգիտի. «Այն կարծիքին եմ, որ այդ փորձառությունն ու անցած ճանապարհը կանեն իրենց գործը: Հասկանում եմ ինձ հետ հանրահավաքների մասնակցած այն մարդկանց մոտեցումները, ովքեր բարիկադների այն կողմում են եղել, բայց պետք է ասեմ, որ մեր ժողովուրդը, 1700 տարվա քրիստոնյա լինելով, ուզում է ոստիկանին և քահանային նույնականացնեն: Ես չգիտեմ որևէ այլ ոստիկան, որը երկար տարիներ աշխատած լինի ոստիկանությունում, ունենա գնդապետի կոչում ու ամեն առավոտ վեր կացած ու օրհնած լինի ժողովրդին, բարեմաղթանքներ արած լինի»:
Պատգամավորը մյուս նշանակումները նույնպես դրական համարեց. «Շատ երիտասարդ, եռանդով լի թիմ է, շատ կարևոր է եռանդը: Միանշանակ, նախկինից շատ ավելի լավ է լինելու, այդ մարդկանց կրթական ցենզը հույս է ներշնչում, որ գործունեությանը շատ արագ կտիրապետեն և ամեն ինչ լավ կլինի»:
Ընդհանուր առմամբ, Սարգսյանն ասաց, որ փորձառության և արագ գործին տիրապետելու առումով նշանակումները շատ ճիշտ էին: «Սա այն դեպքն է, որ նշանակումները մեկին մեկ համընկնում են և իմ անձնական ցանկությանը»:
