ՀՀ Նախագահ Արմեն Սարգսյանի ստորագրած հրամանագրով՝ ՀՀ Աշխատանքի և Սոցիալական հարցերի նախարար է նշանակվել Մանե Թանդիլյանը:
Ներկայացնում ենք Մանե Թանդիլյանի կենսագրությունը.
Մանե Վանյայի Թանդիլյան (ապրիլի 3, 1978, Ալավերդի, ՀԽՍՀ, ԽՍՀՄ), հայ կուսակցական-քաղաքական գործիչ, ՀՀ Աշխատանքի և Սոցիալական հարցերի նախարար, ֆինանսական վերլուծաբանհաշվապահ, Հայաստանի 6-րդ գումարման Ազգային ժողովինախկին պատգամավոր, «Լուսավոր Հայաստան» կուսակցության անդամ։
1999 թվականին ավարտել է Հայկական պետական մանկավարժական համալսարանի պատմական ֆակուլտետը։ 2002 թվականին ավարտել է Հայաստանի ամերիկյան համալսարանի բիզնեսի կառավարման բաժինը՝ ստանալով բիզնեսի կառավարման մագիստրոսի աստիճան։
2003 - 2004 թվականներին աշխատել է «Գառնի Ինվեստմենթ ընդ Դիվելոփմենթ» ՓԲԸ-ում, որպես ֆինանսական վերլուծաբան։ 2004 թվականին եղել է հաշվապահ «Արարատ Գոլդ Ռիքավորի Քոմփանի» ՍՊԸ-ում։ 2004 - 2006 թվականներին աշխատել է «Հովնանյան Ինտերնեյշնլ» ՍՊԸ-ում որպես գլխավոր հաշվապահ, 2006 - 2008 թվականներին նույն պաշտոնը ստանձնել է տեղեկատվական տեխնոլոգիաների ոլորտի «Մենթոր Գրաֆիկս Դիվելոփմենթ Սերվիսիս» ՓԲԸ-ում։ 2009 թվականից մինչ այժմ աշխատում է «Սինոփսիս Արմենիա» ՓԲԸ-ում որպես ֆինանսական տնօրենի տեղակալ, գլխավոր հաշվապահ։
2015 թվականի դեկտեմբերի 15-ից «Լուսավոր Հայաստան» կուսակցության անդամ է։ Նույն թվականի դեկտեմբերի 21-ին ընտրվել է կուսակցության խորհրդի քարտուղար։
2017 թվականին «Ելք» դաշինքի ցուցակով ընտրվել է ՀՀ 6-րդ գումարման Ազգային ժողովի պատգամավոր։ Եղել է այդ ընտրություններում ռեյտինգային ընտրակարգով ընտրված միակ կին պատգամավորը։
Ամուսնացած է, ունի երկու երեխա։
