«Հանձինս Նիկոլ Փաշինյանի ես ինձ համար հայտնաբերեցի տաղանդավոր, արագ մտածող, պատրաստակամ, աշխատասեր մարդու, որի հետ ունեմ շատ լավ աշխատանքային հարաբերություններ »,-այսօր՝ մայիսի 24-ին, լրագրողների հետ զրույցի ժամանակ հայտարարեց ՀՀ նախագահ Արմեն Սարգսյանը՝ խոսելով ՀՀ վարչապետի հետ հարաբերությունների մասին և հավելելով, որ վերջինիս հետ ունի երկկողմանի հարգալից և կոնստրուկտիվ աշխատանքային հարաբերություններ. «Որևէ խնդիր չկա»:
Ինչ վերաբերում է այն հարցին, որ վարչապետի որոշ լիազորություններ կրկին կարող են վերադարձվել նախագահին, Սարգսյանը նշեց, որ ինքը ՀՀ նախագահ լինելու առաջարկն ընդունել է գործող Սահմանադրության պայմաններում. «Ցանկացած երկրում, երբ խոսվում է երկրի կայունության, քաղաքացիների վստահության, ամուր և պետական կառույցներ ունենալու մասին, պետք է մի քանի հիմնարար խնդիրներ լուծել: Դրանցից մեկն իշխանության հավասար բաշխումն է տարբեր թևերի միջև, տվյալ դեպքում հավանաբար ԱԺ-ի, վարչապետի և նախագահի մասին է: Որքան այդ լիազորությունները հավասարաչափ, տրամաբանորեն, Սահմանադրության սահմաններում բաշխված լինեն, համակարգն այդքան կայուն կլինի»:
