Իրանը մտադիր է ՄԱԳԱՏէ-ին տեղյակ պահել, որ հունիսի 5-ին սկսելու է ուրանի հարստացման հզորության աճի գործընթացը: Այս մասին հայտնում է Ինտերֆաքս գործակալությունը՝ հղում անելով Իրանի միջուկային էներգիայի կազմակերպության ներկայացուցիչ Բահրուզ Քամալվանդիին:
ISNA-ն հայտնում է, որ այս մասին Թեհրանը կազմակերպությանը հայտնելու է պաշտոնական նամակի միջոցով:
Ավելի վաղ՝ հունիսի 4-ին, Իրանում ուրանի հարստացման հզորության աճի գործընթաց սկսելու մասին հայտնել էր երկրի հոգևոր առաջնորդ այաթոլլլահ Ալի Համենեին:
Բահրուզ Քամալվանդին նաև նշել է, որ Իրանը կարող է մի քանի օրվա մեջ ուրանի հարստացումը հասցնել 20 տոկոսի:
Իրանը ոչ մեկ անգամ է հայտարարել, որ վերադառնալու է ուրանի հարստացման այն մակարդակին, որը կար մինչև վեցնյակի հետ համաձայնագիրը, եթե ԱՄՆ-ը դուրս գա համաձայնագրից, ինչի մասին մայիսի 8-ին հայտարարեց Միացյալ Նահանգների նախագահ Դոնալդ Թրամփը:
