Այսօր՝ հունիսի 8-ին, կառավարության նիստում ՀՀ Առողջապահության նախարար Արսեն Թորոսյանն օրակարգից դուրս խոսեց հրավառությունների մասին՝ նշելով, որ գիշերը, ժամը 12:300-ին Նորք Մարաշում կատարվել է հրավառություն, ձայնագրությունն էլ կա: Նախարարը նշեց, որ դա տեղի է ունեցել կարգի խախտմամբ՝ խնդրելով համապատասխան կառույցներին զբաղվել հարցով և հավելելով, որ մեկ երեխայի քունն ավելի կարևոր է, քանի 500 մարդու քեֆ-ուրախությունը: Նախարարը նաև առաջարկեց հրավառությունները թույլատրել միայն պետական տոներին:
Վարչապետ Փաշինյանը նշեց, որ հրավառությունների կարգավորման մասով օրենք գոյություն ունի, որը գործում է՝ հիշեցնելով, որ Նորք Մարաշում ոստիկանական բաժանմունք կա և Ոստիկանապետ Վալերիյ Օսիպյանին հանձնարարելով զբաղվել հարցով:
Օսիպյանն իր հերթին նշեց, որ օրեր առաջ լռության կարգի խախտման մասով հայտարարություն է եղել և հայտնել են նաև, թե ինչ պատժամիջոցներ են սահմանված՝ հավելելով, թե շատ բարդ է հայտնաբերել դեպքերը:
Ինչ վերաբերում է կոնկրետ դեպքին, ոստիկանապետն ասաց, որ հետամուտ կլինեն հարցի լուծման համար:
«Դա այնպիսի բան է, որ թռնում է օդ ու պայթում ու դա լինում է մութ ժամանակ»,-կատակեց վարչապետը՝ անդրադառնալով հարցին, որ բարդ է դեպքերը հայտնաբերել:
Օսիպյանը պարզաբանեց, որ խոսքը վերաբերում է կրակողներին հայտնբերելուն:
Վարչապետը նորից կատակեց, թե պետք է մի հատ էլ հայտարարություն տարածել, որ կրակողները կես ժամ պետք է սպասեն ոստիկաններին:
Ամփոփելով քննարկումը՝ վարչապետ Փաշինյանը, արդեն լուրջ խոսելով, ասաց, որ օրենք կա, որ պետք է չլինի հրավառություն կոնկրետ ժամերին, ուրեմն պետք է այդպես էլ լինի, իսկ եթե օրենքը չի գործում, ուրեմն պայքարողները լավ չեն աշխատում:
