Հասարակություն 

Կայացել է «Արևելյան գործընկերության ապագան ալեկոծ ժամանակներում» միջազգային գիտաժողովը

Այսօր կայացավ «Արևելյան գործընկերության ապագան ալեկոծ ժամանակներում» միջազգային գիտաժողովի, որի ժամանակ   ԱԺ «Ելք» խմբակցության պատգամավոր Էդմոն Մարուքյանը հայտարարություն արեց այն մասին, որ  Հայաստանի և Եվրամիության միջև ստորագրած համաձայնագիրը շատ կարևոր դերակատարում ունի Հայաստանի ապագայի համար: Նա նշեց, որ այսօրվա քննարկման մեջ հատկապես կարևոր է իրավունքի գերակայության մասը. «Այսօր քաղաքացիական հասարակության գործընկերներից մեկը պնդում էր, որ քաղհասարակությունը պետք է համախմբվի նոր իշխանությունների հետ ու աշխատի, և ամեն ինչ լավ կլինի: Ես կարծում եմ, որ քաղհասարակությունը չպետք է համախմբվի որևէ կառավարության հետ, որևէ օրվա իշխանության հետ, այլ պետք է watchdog-ի դեր տանի»,- ասաց Մարուքյանը:

Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանն էլ նշեց, որ Հայաստանը մտնում է զարգացման լավ փուլ, երբ քաղաքական օրենքները կսկսեն աշխատել. «Նախկին իշխանություններն ուզում էին հայ ժողովրդի վզին փաթաթել միտքը, թե լավ օրենքները կան, բայց դրանք հայ ժողովրդի համար չեն: Հայ ժողովուրդը պայթեցրեց այդ միտումը ու ճիշտ արեց: Այ հիմա նորմալ կզարգանա Հայաստանը»:

Փորձագետը նշեց, որ ՀՀ-ում կատարվեց իշխանափոխություն, և դա էր պատճառը, որ Արևելյան գործընկերության ձևաչափի բանաձևը փոխվեց և դարձավ 4+2 և ոչ թե 3+3.
«Հայ ժողովուրդն ասաց, որ մենք ուզում ենք ապրել ժողովրդավարության պայմաններում, չենք ուզում նույն մարդուն 4-5-6 անգամ տեսնել, և  դա էր պատճառը, որ բանաձևը դարձավ 4+2, և դա պետք է լինի փաստ շատերիս համար, նաև մեր գործընկեր եվրոպացիների համար»,-ասաց նա:

Ստեփան Գրիգորյանը խոսեց նաև այն մասին, որ  կեղծ ինֆորմացիա էր տարածվում, և եվրոպացի գործընկեներին համոզում էին, թե Հայաստանում ինչ-որ տեռորիստական խմբավորումներ կան: Նա նշեց, որ այլևս նման մոտեցումները «կմաքրվեն». «Ամոթ  է 60 քաղբանտարկյալ ունենալ և դուրս գալ, ասել, որ քաղբանտարկյալներ չկան, դրանք փորձագետներ չեն, ֆեյքային փորձագետներ էին: Այն, որ մարդկանց իրար հետևից բաց են թողնում, ի պատիվ Նիկոլ Փաշինյանի, դատավորների վրա ոչ մի ճնշում չկա, դա կարևոր է և ցույց է տալիս, որ կան քաղբանտարկյալներ, և այդ հարցը պետք է լուծվի»:

Մարդու իրավունքների պաշտպան Արման Թաթոյանն էլ խոսեց այն մասին, որ պետությունը չի նախապատրաստել հասարակությանը բարեփոխումներին: Նա նշեց, որ  չի կարող որևէ երկրից որևէ փորձ մեխանիկորեն ներմուծվել ՀՀ մարդու իրավունքների պաշտպանության ոլորտ՝ առանց հաշվի առնելու մեր առանձնահատկությունները. «Բայց նաև սխալ է մոտեցումը, որ պետք է սպասել, մինչև հասարակությունը զարգանա, նոր Հայաստանում սկսվեն ոլորտային բարեփոխումները: Դրանք պետք է իրականացնել և հասարակությանը տանել հետևից: Այդ առումով մենք մեր երկրում ունեցել ենք բացթողումներ, որովհետև եղել են քայլեր, որոնք իրականացվել են որոշակի ցնցումներով, օրինակ՝ «Ընտանեկան բռնության դեմ» ոլորտի օրենսդրությունը»:

 

  •  
  •  
  •  
  •  
  •  
  •  
  •  
  •  
  •  

Related Articles