Ինչպես ավելի վաղ հայտնել ենք, քիչ առաջ Վճռաբեկ դատարանի որոշմամբ, Արցախի ՊԲ նախկին հրամանատար, Արցախի հերոս Սամվել Բաբայանն ազատ արձակվեց ԱԱԾ մեկուսարանից:
Լրագրողների հետ զրույցում Բաբայանը, պատասխանելով հարցին, թե Արցախ չի մեկնելու արդյո՞ք, ասաց, որ ներկա պահին այդ մասին չի մտածում. «Իմ Արցախ գնալը կախված է Հայաստանի իշխանություններից: Եթե Հայաստանի իշխանությունը, հասարակությունը որոշեն, որ ես պետք է այնտեղ լինեմ, ուրեմ այդպես կլինի: Բայց այս պահին մտադիր չեմ որևէ տեղ գնալ, խնդիր դնել: Դա պետական, լուրջ խնդիր է: Չի կարելի, Ղարաբաղն այսօր շատ վտանգավոր գոտի է, չի կարելի այնտեղ խաղալ»:
Դիտարկմանը, որ Բակո Սահակյանը որոշել է չմասնակցել 2020 թվականի նախագահական ընտրություններին, Բաբայանն ասաց՝ թողեք մինչև 2020 թիվը խաղաղ ապրի Ղարաբաղը, եթե կապրի. «Շատ վատ վիճակում ենք: 2020 թվին, թե ինչ կլինի, ժամանակը ցույց կտա»:
Բաբայանը նաև հաստատեց, որ իրեն ապրիլյան օրերին դիմել են, որ հայտարարություն անի մարդիկ չմասնակցեն ցույցերին, սակայն ինքը մերժել է: Նա անուններ չտվեց:
