ԱԱԾ-ի հրապարակած տեսանյութը բնականաբար չի կարող անտարբեր թողնել որևէ հայ մարդու, այդ թվում նաև ԱԺ նախագահի տեղակալին: Այսօր՝ հունիսի 18-ին, հայտարարեց ԱԺ փոխխոսնակ Էդուարդ Շարմազանովը:
Շարմազանովի խոսքերով, այժմ խնդիրը գտնվում է բացառապես իրավական տիրույթում. «Պետք է հնարավորոթյուն տալ նախաքննությանն օրենքով սահմանված կարգով, Սահմանադրության համաձայն իրականացնել գործողություններ: Բնականաբար, այն, ինչը հրապարակվեց, մեկ բառով նկարագրելը բարդ է՝ վրդովմունք, հիասթափություն: Եթե պարզվի, որ այդ ամենն իրականություն է, կարծում եմ դրան արդարացում չկա: Սա է իմ գնահատականը»,- ասաց Շարմազանովը:
ՀՀԿ-ական պատգամավորի խոսքերով, նաև պետք չէ մոռանալ անմեղության կանխավարկածի մասին. «Մենք դեռ չենք լսել մյուս կողմին: Հետևենք գործի նախաքննությանը: Բայց կրկնում եմ, եթե ԱԱԾ-ի տեսանյութում հրապարակված նյութերն իսկություն են և իրականությանը համապատասխանում է այն, ինչում մեղադրվում է Գրիգորյանը, դրան պետք է ամենախիստ գնահատականը տալ: Ես արարքի մասին եմ խոսում»:
