«Միր» հեռուստաալիքի հետ զրույցում ՀՀ վարչապետ Նիկոլ Փաշինյանը, պատասխանելով հարցին, թե ինչով են ֆուտբոլն ու քաղաքականությունն իրար նման, նշել է, որ երկու դեպքում էլ հաղթում է այն թիմը, որն ունի թիմային ոգի և լավ առաջնորդ:
Ինչ վերաբերում է ՌԴ նախագահ Վլադիմիր Պուտինի հետ հարաբերություններին, Փաշինյանը նշել է, որ այդ հարաբերություններն ազնիվ են ու ուղիղ, ինչը շատ լավ է. «Ես կարծում եմ, որ մենք լավ հասկանում ենք իրար, ինչը թույլ է տվել այսքան կարճ ժամանակում հասնել լավ մակարդակի»:
Անդրադառնալով կոռուպցիայի դեմ պայքարին, ՀՀ վարչապետը նշել է, որ այն պատճառներից մեկն է, որը թույլ չի տվել Հայաստանին զարգանալ այնպես, ինչպես կարելի էր. «Մենք շարունակելու ենք պայքարը կոռուպցիայի դեմ, և ես վստահ եմ, որ լուրջ հաջողություններ կունենանք»:
Խոսելով արտահերթ ընտրությունների մասին, Փաշինյանը հայտարարել է, թե իր այն խոսքերը, որ հիմա ընտրություններն անցկացնելու դեպքում իր գլխավորած ուժը կստանար ձայների մեծամասնությունը, չի նշանակում, որ 6 ամիս անց այդպես չի լինի. «Մենք աշխատելու ենք և փորձելու ենք պահպանել այն վստահությունը, որն այսօր ունենք: Մեր գլխավոր նպատակը բոլոր քաղաքական ուժերի համար հավասար պայմաններ ստեղծելն էր: Մենք իհարկե ցանկանում ենք հաղթել, ուղղակի ցանկանում ենք ժամանակ տալ նաև մյուս ուժերին»: