«Լիդիան Արմենիա» ընկերության աշխատակիցներն այսօր օրը սկսել են կառավարության շենքի մոտ բողոքի ակցիայով: Ընկերության աշխատակիցները պահանջում են պայմաններ ստեղծել իրենց աշխատանքները շարունակելու համար և չխոչընդոտել իրենց աշխատանքին:
Բողոքի ակցիայի մասնակիցների պնդմամբ, ընկերության դեմ նպատակուղղված և լավ ֆինանսավորված հակաքարոզչություն է իրականացվում:
Ակցիայի մասնակիցներն արդեն իրենց նամակն են փոխանցել ՀՀ վարչապետ Նիկոլ Փաշինյանին:
Հավաքված քաղաքացիների թվում է նաև ընկերության տնօրեն Հայկ Ալոյանը, ով նախ ասաց, որ ՀՀ նախագահ Արմեն Սարգսյանը կապ չունի ընկերության հետ, ապա նաև նշեց, թե խնդրում է ՀՀ վարչապետին անել այնպես, որ ճանապարհները բացվեն, որպեսզի ընկերությունն աշխատի:
Նշենք, որ արդեն մեկ շաբաթից ավել է մի խումբ ակտիվիստներ փակել են հանք տանող ճանապարհը և կաթվածահար արել աշխատանքները:
