Ազգային ժողովում այսօր վերսկսվել են ԸՕ փոփոխությունների քննարկման համար ստեղծված խորհրդարանական աշխատանքային խմբի աշխատանքները, առաջարկությունները ներկայացնելու հերթը «Ծառուկյան» խմբակցությանը:
Խմբակցության պատգամավոր Սերգեյ Բագրատյանի կողմից ներկայացված առաջարկություններից մեկն էլ վերաբերում է զինծառայողների քվեարկության ժամանակ վերադաս սպայի ներկայությունն ընտրական տեղամասում արգելելուն:
Սռաջարկությունը Հանրապետական կուսակցության ներկայացուցիչ Վիգեն Սարգսյանի համար անհասկանալի է. «Ի՞նչ ասել է վերադաս սպա: Ուզում եք ասել, որ որևէ սպա չի կարո՞ղ ներկա լինել: Իսկ ենթասպա կարո՞ղ է լինել, սերժանտ կարո՞ղ է լինել: Ջոկի կամ դասակի հրամանատարը կարող է լինել զինվորներից մեկը: Տվյալ զինվորը կարո՞ղ է ներկա լինել: Ես չեմ հասկանում, թե դուք ինչ եք առաջարկում: Ուզում եք ասել, որ շարքային կազմն ու սպայական կազմը պետք է առանձի՞ն քվեարկեն»:
Բագրատյանը դրական պատասխան տվեց նախկին պաշտպանության նախարարի վերջին հարցին:
«Ջհանդա՞մ, որ այդ շարքային կազմի մեջ կան վերադաս հաստիքների նշանակված զինվորներ: Դա խնդի՞ր է, թե՝ ոչ: Իսկ ինչպե՞ս եք լուծելու զինվորների միջև ոչ պաշտոնական հեղինակությունների հարցը: Դուք առաջարկում եք մի բան, որը կյանքի հետ աղերս չունի: Սպան երբեք չի հետևում, թե ինչպես է քվեարկում զինվորը, իսկ եթե հետևելու լինի, դա կանի այլ զինվորի միջոցով, և դուք չեք կարող դա օրենքով կանխել: Հանձնաժողովի նախագահը, դիտորդը պետք է իրենց գործն անեն, ի՞նչ կապ ունի քվեարկողը սպա է, զինվոր, թե ենթասպա: Դա հարց չի լուծում: Դա միայն բարդացնում է քվեարկության գործընթացը»,-ասաց Սարգսյանը:
Հանրապետական կուսակցության մյուս ներկայացուցիչ Դավիթ Հարությունյանը նշեց, որ պետք է գրել ոչ թե «վերադաս սպա», այլ բացառել որևէ անձի վերահսկողությունը:
Կողմերն ընդհանուր հայտարարի եկան վերջին առաջարկության մասով:
