ՀԱԿ փոխնախագահ Արամ Մանուկյանն Ազատության հետ զրույցում նշել է, որ Ռոբերտ Քոչարյանին մեղադրանք առաջադրելու լուրն ընդունել են ուրախությամբ, զանգահարել են իրար և աչքալուսանք տվել:
Արամ Մանուկյանի խոսքերով, մեր ժողովուրդն այսօր կարող է վառված սրտին մի բաժակ սառը ջուր խմել:
Նախկին պատգամավորը հայտարարել է, որ այս օրվանը երկար են սպասել, երբեմն անհույս են եղել. «Ինձ համար չափանիշ է Մարտի 1-ի զոհերի ծնողների վերաբերմունքը: Ես երեկ զանգահարել եմ և շնորհավորել նրանց, աչքալուսանք տվել: Սա աննախադեպ երևույթ է, երբ մարդիկ անգամ մինուճար երեխա են կորցրել, բայց այսօր աչքալուսանք են տալիս, որովհետև արդարության վերականգնումը երբեմն կյանքից ավելի է: Ես նրանց ուրախությունը տեսա Սերժ Սարգսյանի հրաժարականի օրը և երեկ»:
Մանուկյանի խոսքերով, սա հաղթանակ է, որ իրենց որդիները զոհվել են հանուն խաղաղության, երկրի զարգացման. «Այդ մարդկանց կյանքից զրկեցին ազատության, դեմոկրատիայի ճանապարհին»:
