Ռոբերտ Քոչարյանի փաստաբաններից Ռուբեն Սահակյանը լավ ծանոթ չէ դատարանի կողմից կայացված որոշմանը, քանի որ այն ուշ ժամի է ստացվել և այն բավականին ծավալուն է: Այս մասին Սահակյանը հայտարարեց այսօր՝ հուլիսի 28-ին, լրագրողների հետ հանդիպման ժամանակ:
Սահակյանի խոսքերով, պետք չէ իրենց տալ հարցեր, որոնք խախտելու են այն փաստաթուղթը, որի տակ իրենք ստոագրելու են: Խոսքը վերաբերում է նախաքննության գաղտնիքը բացահայտելուն:
«Հիմա բուն գործի մասին: Մենք խոսում ենք ոչ թե Ռոբերտ Քոչարյանի գործի մասին, այլ այն քրգործի, որն ունի մեկ համար՝ այն ամբողջ քրեական գործն է՝ սկսած մարտի 1-ի իրադարձություններից մինչ օրս: Ասեմ, որ մեզ համար որպես ելակետ հանդիսանալու է ՀՔԾ հաղորդագրությունը, որովհետև այն իրավունք ունենք վերլուծելու: Ռոբերտ Քոչարյանի մեղադրանք առաջադրվեց հուլիսի 26-ին: Նրան հրավիրել էին որպես վկա, բայց հենց սկզբից ասացին, որ որոշել են հարցաքննել որպես մեղադրյալ: Ինձ էլ են նման մեղադրանք առաջադրել, հետո կարճել են հանցակազմի բացակայության պատճառով: Ես համոզված եմ, որ այս գործը նույն վախճանն է ունենալու: Ռոբերտ Քոչարյանը ցուցմունք չի տվել, թեև մենք պատրաստվել էինք մանրամասն ցուցմունքի: Քոչարյանը ծանոթանում էր մեղադրանքի որոշմանը, ես չէի ծանոթանում: Երբ նա հայտարարեց, որ ցուցմունք չի տալու, ինձ այդ պահին չէր հետաքրքրում բովանդակությունը: Ես չէի կասկածում, որ նրան կկալանավորեն: Հետո կատարավեցին այն անհրաժեշտ գործողությունները, որոնք կատարվում են: Ես նկատեցի հետևյալը. Նախ սենյակում գտնվում էին մեկից ավելի մարդիկ, նրանցից մեկը վերցրեց Քոչարյանի փոքրիկ ցուցմունքը՝ 17-18 տող և դուրս եկավ սենյակից, մի քանի րոպեից վերադարձավ և բերեց խափանման միջոց կալանավորումն ընտրելու մասին որոշումը: Մտածում էի, որ կձերբակալեն, չէի սպասում, որ բաց կթողնեն: 136 էջանոց փաստաթուղթ տվեցին, 13 էջից բաղկացած որոշումը և ասացին, որ մենք ազատ ենք: Դուրս գալուց հետո Քոչարյանին ասացի, որ հավանաբար հուլիսի 27-ին նիստ կնշանակվի: Ժամը 21:35-ին ինձ դատարան ներկայանալու ծանութագիր է հանձնվել 22:00-ին կայանալիք նիստի մասին: Մտավախություն ունենալով, որ կարող են նիստն առանց մեզ սկսել՝ գնացի դատարան, պարզվեց, որ Քոչարյանին ծանուցագիր չի հանձնվել: Պատճառն այն է, որ նա հոգնածության պատճառով քնաբեր հաբ է խմել ու քնել: Այս մասին ասվել է դատական նիստում»,-ասաց Սահակյանը:
