ՌԴ-ն ոչ պրոֆեսիոնալ է համարում ՀՀ ԱԳՆ-ի հայտարարությունը՝ կապված ՀԱՊԿ գլխավոր քարտուղար Յուրի Խաչատուրովի փոփոխության անհրաժեշտության հետ: Այս մասին հայտնում է ТАСС -ը՝ հղում անելով Մոսկվայի բարձրաստիճան դիվանագետին:
«Այսօր ՀՀ ԱԳՆ-ն հայտարարություն արեց մի առաջարկի՝ կազմակերպության գլխավոր քարտուղարի փոփոխության գործընթաց սկսելու մասին, որն իր ոչ պրոֆեսիոնալիզմով զարմացրեց ՀԱՊԿ անդամ երկրներին» ,- հայտնել է գործակալությանը բարձրաստիճան դիվանագետը :
Նա նաև նշել է, որ նման հայտարարություններ լսելն առավել տարօրինակ է, երբ Հայաստանում տեղի ունեցած փոփոխությունները չեն անդրադարձել արտաքին քաղաքական գերատեսչությունների կազմի վրա, որն էլ ՀԱՊԿ-ին վերջերս ներկայացրել է հենց Խաչատուրովի թեկնածությունը, և որ ամենակարևորն է, տեղյակ է, որ հենց Հայաստանը պետք է սկսի ՀԱՊԿ-ի գլխավոր քարտուղարի, որն այդ պետության ներկայացուցիչն է, հետկանչի գործընթացը:
Աղբյուրը նաև նշել է, որ հենց Երևանը պետք է գրավոր տեղեկանք ներկայացնի ՀԱՊԿ, որից հետո միայն կսկսվի գլխավոր քարտուղարի լիազորությունների դադարեցման գործընթացը. «Եթե Երևանում որոշել են, որ պարոն Խաչատուրովն այլևս իրենց հարմար չէ այդ պաշտոնի համար, ապա Հայաստանից պետք է համապատասխան գրավոր տեղեկանք բերվի ՀԱՊԿ, և միայն դրանից հետո կսկսի պաշտոնական գործընթացը և ոչ թե փոփոխության, այլ լիազորությունների դադարեցման գործընթացը»,- նշել է զրուցակիցը:
Հիշեցնենք, որ Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: