ՀՀ վարչապետ Նիկոլ Փաշինյանի կառավարությունում շատ հանգիստ են վերաբերվում նրան, որ ՀՀ երկրորդ նախագահ Ռոբերտ Քոչարյանի խափանման միջոց կալանքը փոխելու համար իրականացված ստորագրահավաքին միացել են նաև կոալիցիայի մաս կազմող ՀՅԴ-ի պատգամավորները:
Այսօր Ազատության հետ զրույցում ՀՀ փոխվարչապետ Տիգրան Ավինյանը նշել է, որ դա Դաշնակցության իրավունքն է. «Պետք է մի կարևոր փաստ արձանագրել, որ ՀՔԾ-ն գործադիրից որևէ հրահանգ չի ստանում, գործում է անկախ: Այն հրահանգ չի ստանում նաև առաջին ատյանի դատարանից: Հիմա ՀՅԴ-ից և Ծառուկյան խմբակցությունից որոշ պատգամավորներ որոշել են միջնորդել: Դա նրանց իրավունքն է»:
Հարցին, թե դա վստահության խնդիր չի առաջացնում արդյո՞ք, փոխվարչապետը նշել է, որ որոշակի վերլուծության կարիք կա. «Կարծում եմ, որ վերլուծական գործընթացը կբերի որոշակի եզրահանգումների՝ մեր գործընկերների հետ փոխհարաբերվելու առոմով»: