Կառավարության նիստերը լուսաբանող լրագրողներին թույլ չեն տալիս բարձրանալ կառավարության շենք, որպեսզի հարցազրույց անեն գործադիրի անդամների հետ, ինչպես դա միշտ եղել է կառավարության նիստերից առաջ:
Լրագրողների հետ զրույցում վարչապետի խոսնակ Արման Եղոյանն ասաց, որ շենքի անվտանգության ծառայության որոշումն է: Եղոյանը հրաժարվեց հայտնել որոշում կայացնողի անունը՝ միայն նշելով, որ շենքի անվտանգության ծառայությունն է նման որոշում կայացրել:
Հարցին, թե ինչպես է եղել, որ մյուս դեպքերում այլ կերպ է եղել, խոսնակն ասաց, որ նախորդ շաբաթներին բարձրացել են վերև շենքի անվտանգության ռեժիմի խախտմամբ:
Եղոյանը հայտարարեց, որ հարցը կքննարկի անվտանգության ծառայության հետ՝ վստահեցնելով, որ ինքը նման հրահանգ չի տվել:
Հարցին, թե վարչապետ Նիկոլ Փաշինյանը տեղյակ է արդյո՞ք նրանից, թե ինչ է կատարվում հիմա, Եղոյանն անպատասխան թողեց:
Եղոյանը հայտարարեց, որ նիստից հետո գործադիրի անդամներն իջնելու են ներքև և լրագրողները հարցեր տալու հնարավորություն կունենան: Ամեն դեպքում վարչապետի խոսնակը չկարողացավ երաշխավորել, որ լրագրողները կկարողանան հարցեր ուղղել ՀՔԾ պետին և ԱԱԾ տնօրենին, քանի որ նրանք են լինելու որոշողները: