Սոցկայքերի հերոս դարձած պողպատագործ Արկադի Մղդսյանը ՌԻԱ Նովոստիին պատմել է այն մասին, թե ինչպես է իրեն հաջողվել կատարել հնարքը, որ զարմացրել է բոլորին:
Ավելի վաղ համացանցում տարածվել էր մի տեսանյութ, թե ինչպես է Մղդեսյանը ձեռքն անցկացնում հեղուկ մետաղի միջով՝ չստանալով վնասվածք, այրվածքներ: Տեսանյութը Յութուբում ավելի քան 1,5 միլիոն դիտում ունի:
Ինքը՝ Մղդեսյանը, նշել է, որ իր համար անակնկալ է այս հայտնիությունը, քանի որ այն, ինչն ինքն արել է, բազմամյա ավանդույթ է, և Ալավերդիի մետալուրգիական գործարանում այդպես անում են բոլոր երիտասարդ աշխատակիցները, երբ հասնում են վարպետության համապատասխան աստիճանին:
Մղդսյանի խոսքերով, իր հնարքը բացատրվում է Լեյդենֆրոստի էֆեկտով. Եթե մինչև հեղուկ դարձած մետաղի միջով ձեռքն անցկացնելն այն թրջես, դա ձեռքը մեկ ակնթարթ կպաշտպանի այրվածքներից: Պետք է հասցնել այդ կարճ ժամանակի ընթացքում կատարել հնարքը, հակառակ դեպքում վնասվածքն անխուսափելի է:
Ալավերդու գործարանի աշխատակիցը հրաժարվել է տեսախցիկների առաջ կրկնել իր հնարքը՝ հայտնելով, որ գործարանի ղեկավարությունը ոչ միայն չի խրախուսում այն, այլ նաև թույլ չի տալիս նման բան անել: