Մեր երկրում չեն կարող լինել սև կամ սպիտակ ուժեր, չի կարող լինել իմ կամ քո, չի կարելի հասարակությանը բաժանել բարիկադների, ի վերջո ժողովրդի անունից խոսելու իրավունք ունի բացառապես և միայն ժողովուրդը, իսկ ժողովուրդը խոսում է ընտրության ձևով: Այս մասին այսօր՝ սեպտեմբերի 4-ին, լրագրողների հետ զրույցի ժամանակ հայտարարեց Երևանի ավագանու ընտրություններում ԲՀԿ ցուցակը գլխավորող Նաիրա Զոհրաբյանը՝ խոսելով ՔՊ թեկնածու Հայկ Մարությանի հայտարարության մասին, երբ վերջինս հասարակությանը բաժանել էր սևերի և սպիտակների:
Զոհրաբյանը հիշեցրեց, որ Մարությանն ընդունել է վրիպակի, սխալ ձևակերպման փաստը. «Եկեք լինենք ներողամիտ»:
Ինչ վերաբերում է Հայկ Մարությանի «մեր դեմ խաղ չկա» խոսքին, Զոհրաբյանն ասաց, որ դա լսել ենք 90-ականներին և այդ հայտարարությունները երկիրը տարել են դեպի փակուղի. «Սակայն էլի կրկնում եմ, եկեք լինենք ներողամիտ, թեկնածուն քաղաքականության մեջ փորձ չունի, երևի թե ժամանակ է պետք հստակեցնելու համար, թե որ ձևակերպումները չպետք է օգտագործվեն»:
