Ճապոնիան Ռուսաստանի հետ խաղաղության պայմանագիր չի ստորագրելու այնքան ժամանակ, քանի դեռ չեն լուծվել տարածքային վեճերը: Այս մասին հայտարարել է Ճապոնիայի նախարարների կաբինետի գլխավոր քարտուղար Յոսիհիդե Սուգան, փոխանցում է Ինտերֆաքս գործակալությունը:
Ճապոնացի պաշտոնյան նշել է, որ Տոկիոն շարունակելու է բանակցություններ վարել, սակայն հարցը պետք է լուծվի հետևյալ հերթականությամբ՝ տարածքների վերադարձ, հետո՝ խաղաղության պայմանագիր:
Ավելի վաղ ՌԴ նախագահ Վլադիմիր Պուտինը Ճապոնիայի վարչապետ Սինձի Աբեին առաջարկել էր խաղաղության պայմանագիր ստորագրել, հետո քննարկել տարածքային հարցերը:
Նշենք, որ Ռուսաստանն ու Ճապոնիան խաղաղության պայմանագիր չեն կարողանում ստորագրել Երկրորդ համաշխարհային պատերազմից հետո: Հիմնական վեճը վերաբերում է Կուրիլյան կղզիներին, որի մասով կողմերը չեն կարողանում ընդհանուր հայտարարի գալ: