Քրեակատարողական հիմնարկներում այլևս խցի համար գումարներ չեն հավաքվում, դատապարտյալներին չեն պարտադրում խաղալ մոլեխաղեր, մեկ դատապարտյալին բաժին է ընկնում մեկ մահճակալ, ինչը չկար նախկինում: Այս մասին Ազատության հետ զրույցում հայտարարել է Արդարադատության նախարար Արտակ Զեյնալյանը:
Զեյնալյանի խոսքերով, հիմա ՔԿՀ-ներում չկան արտոնյալներ, չկան խցեր, որոնք չեն կարող չխուզարկվել, բարելավվել է սնունդը, ինչի մասին ազդակներ է ստանում:
Ինչ վերաբերում է ՔԿՀ-ներում անմարդկային պայմանների մասին հայտարարոթյուններին, Արդարադատության նախարարը նշեց, որ ազատազրկումը չի կարող չունենալ նաև որոշակի անհարմարություններ և զրկանքներ, ինչն արձանագրված է ՄԻԵԴ-ի կողմից:
Զեյնալյանն ասաց, թե ընդունում են, որ Հայաստանում բարվոք պայմաններ չկան և պետք է քայլեր ձեռնարկվեն վիճակը բարելավելու համար:
Արդարադատության նախարարը նաև հայտնեց, որ Հայաստանի պատմության մեջ առաջին անգամ ցմահ դատապարտյալի տրվել է դրական եզրակացություն: