Քաղաքացի Վահրամ Աթանեսյանը երեկ հանդես էր եկել պարզաբանմամբ, որ «Հրապարակ» օրաթերթում Արցախի ԱԺ նախագահի կողմից ոմն քաղաքացու ընտրակաշառք առաջարկելու ձայնագրության վերաբերյալ հրապարակված նյութի հեղինակն ինքն է:
Անիմաստ համարելով անդրադառնալ իրականության հետ ոչ մի աղերս չունեցող և միայն իր վառ երևակայության մեջ գոյություն ունեցող իրարամերժ պատմություններին, կնշեմ միայն երկու իրողության մասին.
Ենթադրյալ ձայնագրությունը տեղի է ունեցել քաղաքացի Վահրամ Աթանեսյանի և ոմն քաղաքացու միջև հեռախոսազրույցի արդյունքում, որը նա սկզբնապես վերագրում էր ԱԺ նախագահին:
Նյութը սկզբից մինչև վերջ մաքուր զրպարտություն է: Այն բանից հետո, երբ դիմեցի «Հրապարակի» խմբագրություն, ասելով, որ դատարան կդիմենք, հայտնվեց նյութի հեղինակը:
Ի դեպ, մինչ այս ամենի բացահայտումը, երբ նախնական կասկածների մասին բարձրաձայնեցի ԱԺ նախագահի մոտ, ինքը համառորեն հրաժարվում էր ընդունել, որ նյութի հեղինակը կարող է լինել հենց Վ.Աթանեսյանը:
Եվ հիմա, երբ ավելի քան պարզ է այս ամենի անլրջությունը, ԱԺ նախագահը, իրեն հատուկ մեծահոգությամբ, փակում է այդ թեման՝ ելնելով Վ.Աթանեսյանի շահերից այնպես, ինչպես նախորդ տարիներին, երբ համանման վերաբերմունք էր դրսևորում Աթանեսյանի բոլոր արկածախնդրությունների դեպքում:
Արցախի ԱԺ նախագահի խոսնակ Անուշ Ղավալյան