Լուսավոր Հայաստան կուսակցության նախագահ, ԱԺ ԵԼՔ խմբակցության պատգամավոր Էդմոն Մարուքյանը շնորհակալ է բոլոր նրանց, ովքեր, նրա խոսքերով, այս ծանր պայմաններում ձայն են տվել Լույս դաշինքին:
Ազատության հետ զրույցում Մարուքյանը հայտարարեց, որ հետհեղափոխական պայմաններում նորմալ ընտրարշավ տեղի չի ունեցել, էքստրաօրդինար իրավիճակում Լույս դաշինքը դարձել է երրորդ ուժը, ինչը լուրջ հայտ է: Պատգամավորը վստահություն հայտնեց, որ իրենց ձայներն աճող են:
Մարուքյանը հայտարարեց, որ տեղի ունեցած ընտրությունները բացառիկ էին՝ չկար փողի գործոն, մարդիկ իրենք են որոշել, թե ում օգտին քվեարկել:
Ինչ վերաբերում է նրան, որ արդեն գիշերը Լույսը՝ ի դեմս Արտակ Զեյնալյանի և Դավիթ Խաժակյանի գնացել են շնորհավորելու Իմ քայլը դաշինքին, Մարուքյանը հայտարարեց, որ ինքը ևս շնորհավորել է՝ զանգահարելով փոխվարչապետ Արարատ Միրզոյանին, քանի որ վարչապետ Փաշինյանը Հայաստանում չէ:
Խորհրդարանը ցրելու խնդրի մասով, ԵԼՔ պատգամավորն ասաց, որ իրենց տոտալ պահանջն այդ մասով կա, իսկ նոր խորհրդարանական ընտրություններին Լույս դաշինքը, ամենայն հավանականությամբ կպահպանվի, հնարավոր է լինի ընդլայնում:
Հավելենք, որ Լույսի առաջին համար Արտակ Զեյնալյանը հրաժարվելու է մանդատից և վերադառնալու է նախարարի պաշտոնին:
