Ալավերդու պղնձաձուլական գործարանի աշխատակիցները բացել են Մ-6 միջպետական ճանապարհն ու Հարավկովկասյան երկաթուղու երկաթգիծը:
Նշենք, որ ՀՀ Բնապահպանական պետական տեսչության կողմից անցկացված ստուգումների արդյունքում պարզվել է, որ Ալավերդու պղնձաձուլարանի աշխատանքի արդյունքում առաջացած ծուխը թույլատրվածից շատ է, ինչի պատճառով էլ «Վալլեքս» խմբի մեջ մտնող «Էյ-Սի-Փի» ընկերությունը տուգանվել է: Ըստ Analitik.am-ի տեղեկությունների, տուգանքն այնքան մեծ է, որ պղնձաձուլարանը գերադասել է փակվել, քան մուծել տուգանքները և շարունակել աշխատանքը: Հաշվի առնելով այն, որ պղնձաձուլարանում աշխատում է մոտ 600 մարդ, Բնապահպանական տեսչությունը տեղեկացվել է գործարանի հնարավոր փակման մասին, սակայն չի փոխել տուգանքի չափը: Արդյունքում աշխատակիցները փակել էին Մ-6 միջպետական մայրուղին՝ պահանջելով, որպեսզի պղնձաձուլարանը չփակվի: Այս պահին աշխատակիցները բացել են մայրուղին և երկաթգիծը, քանի որ վաղը պղնձաձուլարանում ժողով է տեղի ունենալու, ինչի արդյունքում վերջնական որոշում կկայացվի՝ շարունակելու է աշխատել գործարանը, թե՝ ոչ:
Նշենք, որ գործարանի աշխատակիցներն արդեն ստացել են համապատասխան զգուշացման թերթիկներ: