ՀՀ վարչապետը, պատգամավորի մանդատ ստանալով ընդուել է, որ գործող Ազգային ժողովը լեգիտիմ է, ինչը ևս մեկ անգամ հաստատեց, երբ արդեն ընտրվեց վարչապետ: Այս մասին այսօր՝ հոկտեմբերի 15-ին, լրագրողների հետ հանդիպման ժամանակ հայտարարել է Մենուա Հարությունյանը:
Հարությունյանի խոսքերով, Փաշինյանը զոռբա քաղաքական գործիչ է, ով օգտագործելով ստեղծված քաղաքական իրավիճակը, զոռբայությամբ փորձում է տիրանալ իշխանությանը, իսկ խորհրդարանը լուծարելը զոռբայության վերջին քայլն է:
Հարությանյանը նշել է, որ վարչապետ Փաշինյանը պետական մտածողություն չունի և քանդում է պետական բոլոր ինստիտուտները. «Ես համաձայն եմ, որ երկրի տերը ժողովուրդն է: Սակայն ժողովուրդը պետության կառավարմանը պետք է մասնակցի ընտրությունների միջոցով: Չի կարելի ժողովրդի մի մասին ոտքի հանել աթոռների համար՝ գնալով պետական ինստիտուտները ոչնչացնելու ճանապարհով»:
Մամուլի ասուլիսի ժամանակ, Հարությունյանը հայտարարեց՝ եթե խորհրդարանը լուծարվի, կարելի կլինի արձանագրել, որ Նիկոլ Փաշինյանի զոռբայությունը հասավ իր նպատականին:
Ինչ վերաբերում է նրան, թե ինչու է վարչապետը ցանկանում ընտրությունները դեկտեմբերին կազմակերպել, Հարությունյանը վստահ է՝ վարչապետը գիտակցում է, որ հաջորդ տարի չի ունենալու այն դրական վարկանիշը, որն այսօր կա, որովհետև խաբել է հասարակությանը. «Ձմեռն անցնելուց հետո հասարակությունը սկսելու է հիասթափվել: Խորհրդարանական արտահերթ ընտրություններին այսքան շուտ պատրաստ է միայն ՔՊ-ն: Նա ուզում է, որ ընդդիմությունն էլ իրենը լինի, դրա համար էլ շտապողականություն է ցուցաբերում: Նա հայտարարում է, որ նոր Հայաստան է կերտում, իսկ եթե պետք է նոր Սերժ Սարգսյան դառնա, նշանանակում է՝ նա խաբել է ժողովրդին: Նա ուղղակի փոխում է անունները՝ պահպանելով համակարգը»:
