ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է հայ-ամերիկյան հարաբերությունները և Հայաստանում ԱՄՆ նախկին դեսպան Ռիչարդ Միլսի հայտարարությունը:
«Մենք ուշադրություն ենք դարձրել Միացյալ Նահանգների դեսպան պարոն Միլսին, որն ավարտում է իր առաքելությունը Հայաստանում: ԱՄՆ դեսպանը հայտարարել է, որ իր երկրի կառավարությունը՝ ԱՄՆ դեսպանատունը վերջին տասնամյակների ընթացքում նպատակաուղղված աջակցություն է ցուցաբերել հայաստանյան որոշ խմբերի և կառավարության որոշ ներկայացուցիչների: Միևնույն ժամանակ, դեսպանը խոսել է ինքնիշխան պետության ներքին գործերին միջամտելու մասին՝ առանց կաշկանդվածության: Իբր այդ ամենը եղել է արդարացված և անհրաժեշտ այն բարի նպատակի համար, որը Հայաստանում կստեղծի ավելի արդար և թափանցիկ հասարակություն», -ասել է Զախարովան:
Զախարովան հավելել է նաև, որ Միլսը հրաժեշտի իր ուղերձում Հայաստանի քաղաքացիներին ցանկացել է, որպեսզի նրանք «վերահսկեն կառավարության գործունեությունը» և ԱՄՆ-ի լրացուցիչ միջոցների մեծ մասը կաջակցի Հայաստանում քաղաքացիական հասարակությանը:
